X-Press Pearl නෞකාව මෙරට මුහුදු සීමාවට ඇතුළු වීම සහ එමගින් සිදු වූ දැවැන්ත හානිය වළක්වා ගැනීමට නොහැකි වීම ඇතුළු කරුණු සම්බන්ධයෙන් විධිමත් විමර්ශනයක් පැවැත්වීමට අදාළ වගකිවයුතු අංශ වෙත නියෝගයක් නිකුත් කරන ලෙස ඉල්ලා ශ්රේෂ්ඨාධිකරණයට මූලික අයිතිවාසිකම් පෙත්සමක් ඉදිරිපත් වී තිබේ.
පරිසර යුක්ති කේන්ද්රයේ විධායක අධ්යක්ෂ හේමන්ත විතානගේ සහ ධීවර වෘත්තිකයන් කණ්ඩායමක් විසින් මේ පෙත්සම ඉදිරිපත් කර ඇත. මේ පෙත්සමේ වගඋත්තරකරුවන් ලෙස නම්කර ඇත්තේ ශ්රී ලංකා වරාය අධිකාරිය, සමුද්ර ආරක්ෂණ අධිකාරිය, මධ්යම පරිසර අධිකාරිය, වරාය ඇමැති රෝහිත අබේගුණවර්ධන, රාජ්ය ඇමැති නාලක ගොඩහේවා, පරිසර ඇමැති මහින්ද අමරවීර, ජාතික ජලජ සම්පත් පර්යේෂණ සහ සංවර්ධන ආයතනය හෙවත් නාරා ආයතනය ඇතුළු ආයතන ප්රමුඛ රාජ්ය ආයතන සහ වගකිවයුතු පුද්ගලයන් වේ.
මේ නෞකාව මෙරට මුහුදු සීමාවේදී ගිනිගැනීමත්, එහි තිබූ රසායනික ද්රව්ය මුහුදු ජලයට මිශ්ර වීමත් නිසා මුහුදට මෙන්ම වෙරළට ද බරපතළ විනාශයක් සිදුවී ඇති බව පෙත්සම්කරුවෝ පෙන්වා දී තිබේ.