ගාල්ලේ නව මාතෘ (ශික්ෂණ) රෝහල ඉදිකිරීමේ කටයුතු අවසන් කිරීම සඳහා ලබාදුන් යුරෝ මිලියන 13 ක ණය මුදල, ප්‍රදානයක් බවට පරිවර්තනය කිරීමට ජර්මානු රජය ප්‍රතිඥා දී ඇති බව වාර්තා වනවා.
නිවේදනයක් නිකුත් කරමින් මුදල් අමාත්‍යාංශය පැවසුවේ, මේ සඳහා ජර්මානු KfW බැංකුවෙන් ලබාගත් අතිරේක ණය මුදල ප්‍රදානයක් බවට පත් කිරීමට ජර්මානු රජය යෝජනා කර ඇති බවයි.
ඒ අනුව, මුදල් අමාත්‍යාංශයේ ලේකම් එස්ආර් ආටිගල මහතා, KfW සංවර්ධන බැංකුවේ සෞඛ්‍ය හා සමාජ ආරක්ෂණ ආසියානු අංශයේ ප්‍රධානී Martina Koch මහත්මිය සහ KfW සංවර්ධන බැංකුවේ සෞඛ්‍ය හා සමාජ ආරක්ෂණ (ආසියා) හි ජ්‍යෙෂ්ඨ ව්‍යාපෘති කළමනාකරු Annika Unterpertinger මහත්මිය යුරෝ මිලියන 13ක ප්‍රදාන ගිවිසුමක් සඳහා පෙරේදා (03) කොළඹදී අත්සන් තැබීය.
ජර්මානු රජය සහ ශ්‍රී ලංකා රජය අතර දිගුකාලීන සමීප හවුල්කාරිත්වය ශක්තිමත් කිරීමේ අරමුණින් මෙම ගිවිසුම අත්සන් කර ඇත.
සුනාමි ව්‍යසනයෙන් බරපතළ හානි වූ මහමෝදර මාතෘ රෝහල ජර්මානු රජයේ KfW බැංකුව හරහා මූල්‍ය ආධාර මත ප්‍රතිසංස්කරණය කෙරේ.
‘Helmut Khol’ පදනමේ ප්‍රදානයකින් ආරම්භ කරන ලද රෝහලේ ප්‍රතිසංස්කරණ කටයුතු නිම කිරීම සඳහා KfW ආයතනය යුරෝ මිලියන 28 ක ණය මුදලක් ලබා දී ඇත.
ඉදිකිරීම් සිදුවෙමින් පවතින අතරතුර, රෝහලේ අමතර අවශ්‍යතා ආවරණය කිරීම සඳහා KfW විසින් 2017 දී යුරෝ මිලියන 13 ක අතිරේක ණයක් ලබා දෙන ලදී.
ඇඳන් 600 කින් සහ 800 කට ප්‍රතිකාර කිරීමේ පහසුකම් සහිත බාහිර රෝගී අංශයේ (OPD) සහ සායනද මීට ඇතුලත් වේ.
