වත්මන් රජය බලයට පත් කිරීමට යම් කාර්‍යභාරයක් ඉටු කළ නමුත් රජයේ තීරණ ගනු ලබන්නේ තමන් නොවන අබ්ව ජනප්‍රිය රංගන ශිල්පිනී ඕෂධී බුද්ධිමා හේවාමද්දුම පවසනවා.
ඒ, ඉහළ ගිය ගෑස් මිල සම්බන්ධව සිය ෆේස්බුක් ගිණුමේ සටහනක් තබමින්.
ඕෂධී හේවාමද්දුම මහත්මිය පසුගිය මහමැතිවරණයේදී වියත්මග නියෝජනය කරමින් ශ්‍රී ලංකා පොදුජන පෙරමුණ පක්ෂයෙන් බදුල්ල දිස්ත්‍රික්කයට තරඟ වැදුණා.
එහෙත් ඇය එම දිස්ත්‍රික්කයෙන් පරාජයට පත්වූ අතර ඇයට ලබාගත හැකිවූයේ මනාප 10,957 ක් පමණයි.
එමෙන්ම, සෞඛ්‍ය සේවකයන්ගේ හිඟයක් ඇති වුවහොත් කොවිඩ් රෝගීන් වෙනුවෙන් ස්වෙච්ඡා සේවය සඳහා තමන් සූදානම් බව ඇය පසුගිය අගෝස්තු මස පවසා සිටියා.
සිය ෆේස්බුක් ගිණුමේ සටහනක් තබමින් එම කාර්යය සදහා අප සූදානම්ද යන්නත් ඇය ජනතාවගෙන් විමසා සිටියා.
මේ අතර, පසුගිය ජනාධිපතිවරණයේදීත් මහමැතිවරණයේදීත් ශ්‍රී ලංකා පොදුජන පෙරමුණට සහය දැක්වූ කලකරුවන් අතර ඉදිරියෙන්ම සිටි ප්‍රවීණ රංගන ශිල්පිනී නිල්මිණි තෙන්නකෝන් මහත්මියද රට හැර යෑමේ සූදානමින් සිටිනවා.
ඇය Youtube නාලිකාවක් සමඟ පැවති සම්මුඛ සාකච්ඡාවකදී පැවසුවේ තමන් ශ්‍රී ලංකාවට ඉතාමත් ආදරය කරන බවත් මෙරට දමා යෑම වේදනාත්මක බවත්ය.
