ලෝක සෞඛ්‍ය සංවිධානය, ගාසාහි අල්-ෂිෆා රෝහල මරණීය කලාපයක් ලෙස නම් කර තිබෙනවා.
ඊශ්‍රායල හමුදාව අල්-ශිෆා රෝහල අත්පත් කර ගෙන එහි සිටි රෝගීන් සහ අනෙකුත් පිරිස් ඉවත් කිරීමට කටයුතු කිරීමෙන් අනතුරුව ලෝක සෞඛ්‍ය සංවිධානයේ නියෝජිත කණ්ඩායමක් පැයක පමණ කාලයක් එම පරිශ්‍රයේ නිරීක්ෂණය කිරීමට පියවර ගෙන තිබුණා.
ඒ අනුව, රෝහල තුළ ෂෙල් වෙඩි ප්‍රහාර සහ වෙඩි තැබීම් පිළිබඳ සාක්ෂි තමන් දුටු අතර රෝහල් පිවිසුම අසල සමූහ මිනීවළද දැක ගන්නට ලැබුණු බව එම නිලධාරීන් පවසා තිබෙනවා.
ඔවුන් තවදුරටත් සඳහන් කර ඇත්තේ පුද්ගල මළසිරුරු 80ක් පමණ එහි ගොඩ ගසා ඇති බවයි.
අල්-ශිෆා රෝහලෙන් එහි සිටින පිරිස් ඉවත් කරන ලෙස ඊශ්‍රායල හමුදාව නිවේදනය කර තිබුණත් එම රෝහල තුළ රෝගීන් 300ක් පමණ තවමත් රැඳී සිටින බව විදෙස් මාධ්‍ය වාර්තා කරනවා.
කෙසේවෙතත්, ඊශ්‍රායල හමුදාව පවසා ඇත්තේ අල්-ශිෆා රෝහලේ අධ්‍යක්ෂවරයාගේ ඉල්ලීම මත මෙලෙස රෝගීන් ඉවත් කිරීම සිදු කළ බවයි.
මේ අතර, ගාසා තීරයේ ඉතිරිව සිටින රෝගීන් සහ කාර්ය මණ්ඩලය කඩිනමින් ආරක්ෂිත ස්ථාන කරා රැගෙන යාමට තම සංවිධානය උත්සාහ දරන බව ලෝක සෞඛ්‍ය සංවිධානය පවසනවා.
එම සංවිධානය තවදුරටත් පවසන්නේ ඔවුන් නැවත නැවතත් සටන් විරාමයක් සඳහා ඉල්ලීම් සිදු කරන බවයි.
