මේ මස අගදී පැවැත්වීමට නියමිතව තිබෙන රජයේ වෛද්‍ය නිලධාරීන්ගේ සංගමයේ නිලවරණය සඳහා වෛද්‍ය ජයරුවන් බණ්ඩාර මහතා ඉදිරිපත් කළ නාමයෝජනා ප්‍රතික්ෂේප කිරීමට රජයේ වෛද්‍ය නිලධාරීන්ගේ සංගමයේ නාමයෝජනා කමිටුව කටයුතු කර තිබෙනවා.
වෛද්‍ය ජයරුවන් බණ්ඩාර මහතා සිය නාමයෝජනා ඉදිරිපත් කර තිබුණේ රජයේ වෛද්‍ය නිලධාරීන්ගේ සංගමයේ සභාපති තනතුර සදහායි.
නාමයෝජනා ප්‍රතික්ෂේප කිරීමට හේතුව ලෙස නාමයෝජනා කමිටුව සඳහන් කර ඇත්තේ වෛද්‍ය ජයරුවන් බණ්ඩාර මහතාගේ සාමාජික අංකය නිවැරදිව සටහන් කර නොමැතිවීමයි.
මේ සම්බන්දයෙන් අදහස් දක්වමින් වෛද්‍ය ජයරුවන් බණ්ඩාර මහතා පවසන්නේ මේ පිළිබදව අවශ්‍ය නීතිමය ක්‍රියාමාර්ග ගන්නා බවයි.
රජයේ වෛද්‍ය නිලධාරීන්ගේ සංගමයේ සභාපති ධූරයේ මේ වන විට වෛද්‍ය අනුරුද්ධ පාදෙනිය මහතා කටයුතු කරන අතර ඔහු වසර ගණනාවක් පුරා නිතරඟයෙන් එම ධූරයට පත්වනවා.
මෙවර නිලවරණය සඳහා වෛද්‍ය ජයරුවන් බණ්ඩාර හා වෙනත් තනතුරු සඳහා තරඟ කරන වෛද්‍යවරුන්ව සමාජ මාධ්‍ය හරහා බියගැන්වීමේ ක්‍රියාවලියක් සිදුවන බවටද එම වෛද්‍යවරුන් චෝදනා කරනවා.
රජයේ වෛද්‍ය නිලධාරීන්ගේ සංගමයේ නිලවරණය එළැඹෙන 26 වනදා පැවැත්වීමට නියමිතයි.
