ජනාධිපති ගෝඨාභය රාජපක්ෂ මහතා, ත්‍රෛනිකායික මහ නා හිමිවරුන් වෙත ලිපියක් යොමුකරමින් ලිඛිතව සිය ප්‍රතිචාරය දැනුම් දී ඇති බව අස්ගිරි පාර්ශවයේ ලේඛකාධිකාරී පූජ්‍ය මැදගම ධම්මානන්ද හිමියන් සඳහන් කර සිටිනවා.
අන්තර්වාර පාලනයක් ඇති කිරීම සඳහා ජනාධිපතිවරයාගේ කැමැත්ත එහිදී පළ කර තිබූ බවයි උන්වහන්සේ පවසන්නේ.
එමෙන්ම මේ වන විට රටේ පවතින අර්බුදකාරී වාතාවරණය නැති කොට මහජනතාවගේ සුභසිද්ධිය සම්බන්ධයෙන් අවශ්‍ය ක්‍රියාමාර්ග ගැනීමට ඉක්මන් පියවර ගන්නා බවට ද ජනාධිපතිවරයා සිය ලිපියෙන් දැනුම් දී ඇති බවයි උන්වහන්සේ වැඩිදුරටත් සඳහන් කර සිටින්නේ.
“ත්‍රෛනිකායික මහනායක හිමිවරුන් පසුගිය අවස්ථා කිහිපයක දී ම ගරු ජනාධිපතිතුමා ඇතුළු රජයට ලිඛිතව දැනුම් දුන්නා. අනුශාසනා කළා වර්තමානයේ රට තුළ පවතින අර්බුදකාරී තත්ත්වයන්ට විසඳුම් වශයෙන් කළ යුතු ක්‍රියාදාමයන් පිළිබඳව. ඒ අනුව ඒ පිළිබඳව අවධානය යොමුකළ ගරු ජනාධිපතිතුමා අතිගරු මහානායක මාහිමිපාණන්වහන්සේ ට ලිඛිතව දැනුම් දී තිබෙනවා එතුමාගේ ප්‍රතිචාරය. ඒ අනුව මහනායක මාහිමිපාණන් වහන්සේලා දැනුම්දුන් ආකාරයට ඒ ආර්ථික ප්‍රශ්න, රටේ අර්බුදකාරී තත්ත්වයන් නැති කරලා, මහජනතාවගේ සුබ සාධනය සිද්ධ කිරීමට උත්සුක වෙන බව සඳහන් කරනවා.
විශේෂයෙන් ජාත්‍යන්තර මුල්‍ය අරමුදල සමග කරන සාකච්ඡා පිළිබඳවත් සඳහන් කරනවා. ඒ වගේම අන්තර්වාර පාලනයක් ඇති කිරීමට එතුමාගේ කැමැත්ත පළ කොට තිබෙනවා. ඒ සමගම ව්‍යවස්ථා සංශෝධනය පිළිබඳ පාර්ලිමේන්තුව තුළ සාකච්ඡා කරලා, ඒ කටයුතු සිදුවිය යුතු බවත් එතුමා දැනුම් දී තිබෙනවා. ඒ පිළිබඳව ඉදිරියේදීත් යම් යම් කරුණු තිබෙනවා නම් අතිගරු මහානායක මාහිමිපාණන් වහන්සේලා ට දැනුවත් කරන බවත් එතුමා දැනුම් දී තිබෙනවා.”
