හිටපු ජනාධිපති ගෝඨාභය රාජපක්ෂ හෙට හෝ අනිද්දා දින මෙරටට පැමිණෙනු ඇති බව ඩේලි මිරර් පුවත්පත වාර්තා කරනවා
මූලාශ්රයක් උපුටා දක්වමින් ඩේලි මිරර් පවසන්නේ තායිලන්තයට පලා ගොස් සිටින හිටපු ජනාධිපතිවරයා සැප්තැම්බර් මුල් සතියේ යළි ශ්රී ලංකාවට පැමිණීමට සූදානමින් සිටින බවත් බොහෝ දුරට සැප්තැම්බර් 2 වැනිදා හෝ 3 වැනිදා ඔහු එසේ නැවත පැමිණීමට ඉඩ ඇති බවත් ය.
ගෝඨාභය රාජපක්ෂ බලයේ සිටියදී ඔහුට එරෙහිව දැවැන්ත විරෝධතා පැනනැඟුණු අතර රටේ ආර්ථික අර්බුදය හේතුවෙන් කෝපයට පත් ජනතාව ඔහුගේ නිල නිවසට සහ කාර්යාලයට කඩා වැදීමෙන් පසුව ජූලි 13 දා අලුයම ඔහු ශ්රී ලංකාවෙන් පලා ගියේය. පළමුව මාලදිවයිනටත්, ඉන් අනතුරුව සිංගප්පූරුවටත් පැමිණීමෙන් පසුව ඔහු ජනාධිපති ධුරයෙන් ඉල්ලා අස් වූ අතර සිංගප්පූරුවේදී ඔහුට දින 14ක සංචාරක අවසර පත්රයක් නිකුත් කරන ලදී.
ඉන් පසුව හිටපු ජනාධිපතිවරයා අගෝස්තු 11 වැනිදා තායිලන්තයට ළඟා විය.
මේ වන විට ඔහුගේ මිරිහාන නිවසට දැඩි ආරක්ෂාවක් සපයා ඇති බව පැවසේ.