කාබනික පොහොර භාවිතා කිරීමේ තීන්දුව ආපස්සට හැරවීම සඳහා රසායන පොහොර ආනයනකරුවන් සහ නිෂ්පාදකයන් විසින් විශාල මුදලක් වැය කරමින් අති විශාල කුමන්ත්‍රණයක යෙදී සිටින බව කෘෂිකර්ම අමාත්‍ය මහින්දානන්ද අලුත්ගමගේ මහතා පවස්නවා
ඒ, අද (9) දින විපක්ෂ නායක සජිත් ප්‍රේමදාස මහතා ස්ථාවර නියෝග 27 (2) යටතේ මතු කළ ප්‍රශ්නයකට පිළිතුරු දෙමින්.
රසායනික පොහොර මාෆියාව යනු මේ ලෝකයේ දෙවැනි විශාලතම මාෆියාව බවයි ඔහු පෙන්වා දෙන්නේ.
කෙසේ නමුත් රජය ගොවියා ඉල්ලූ පොහොර ටික ලබා දුන් බවත් රටේ කෘෂිකර්මාන්තය කඩාවැටීමට රජය කිසිසේත්ම ඉඩ නොදෙන බවත් රටේ ආහාර සුරක්ෂිතතාව තහවුරු කරන බවත් පැවසූ අමාත්‍යවරයා ආනයනය කෙරෙන පොහොර සම්බන්ධයෙන් භූතයකු මවමින් සිටින බවත් ආනයනය කෙරෙන පොහොර සම්බන්ධයෙන් වගකීම රජය බාර ගන්නා බවත් සඳහන් කර සිටිනවා.
චීන පොහොර නැව ආපසු හරවා යැවුවේ එය නියමිත ක්‍රමවේදයට අනුව නොපැමිණි නිසා බව පැවසූ ඔහු කාබනික පොහොරවලට එරෙහි කුමන්ත්‍රණය පිටුපස සිදුවූ දුරකතන සංවාද මෙන්ම සමහරුන්ගේ බැංකු ගිණුම්වලට එන මුදල් සම්බන්ධයෙන් තොරතුරු හෙළි කිරීම සඳහා තමාට කෙටි කාලයක් ලබාදෙන ලෙසත් ඉල්ලීමක් කර සිටියා.
