මිනුවන්ගොඩ අල් අමාන් මුස්ලිම් මහා විද්‍යාලයේදී සාමාන්‍ය පෙළ විභාගයට පෙනී සිටින අතරතුර අසාධාරණයකට ලක් වූ සිසුන් පිරිසක් අද (20) ප්‍රකාශ ලබාදීම සඳහා මානව හිමිකම් කොමිසමට පැමිණ තිබෙනවා.
පසුගියදා (15) මිනුවන්ගොඩ අල් අමාන් මුස්ලිම් මහා විද්‍යාලයේදී සාමන්‍ය පෙළ විභාගයට පෙනී සිටි සිසුන් 14 දෙනෙකුට භූගෝල විද්‍යාව ප්‍රශ්න පත්‍රයේ පළවෙනි පත්‍රය සහ අදාළ සිතියම් ලබා දීම අතපසු වී තිබුණා.
ලංකා ගුරු සංගමයේ ලේකම් ජෝසප් ස්ටාලින් මහතා මානව හිමිකම් කොමිසමට මේ පිළිබඳව පැමිණිල්ලක්ද යොමු කරනු ලැබුවා.
අනතුරුව, මෙම ගැටලුව සම්බන්ධයෙන් විමර්ශනය කිරීම සඳහා විභාග කොමසාරිස්වරයාද මානව හිමිකම් කොමිසමට කැඳවා තිබූ අතර මෙයට සමගාමීව අද අල්අමාන් මහා විද්‍යාලයේ භූගෝල විද්‍යාව ප්‍රශ්න පත්‍රයට මුහුණ දුන් ශිෂ්‍යයන්ද අද මානව හිමිකම් කොමිසමට පැමිණ ප්‍රකාශ ලබා දී තිබෙනවා.
තමන්ට භූගෝල විද්‍යා පළමු පත්‍රය සහ සිතියම ලබා නොදීම නිසා තමා අසාධාරණයට පත් වූ බව මෙම සිසුන් කොමිසම හමුවේ අනාවරණය කර තිබුණා.
මෙම ගැටලුව සම්බන්ධයෙන් සලකා බලා ඉතා කඩිනමින් තමන්ට සාධාරණයක් ඉටුකර දෙන ලෙසද මෙම සිසුන් ඉල්ලා සිටිනවා.
