විශ්වවිද්‍යාල අධ්‍යාපනය ලබන දරුවන් දෙදෙනාට මාරක අනතුරු ඇති බව පවසා මුදල් සහ ස්වර්ණාභරන ලබාගෙන පළාගිය තිදෙනෙක් අත්අඩංගුවට ගෙන රක්ෂිත බන්ධනාගාරගත කර තිබෙනවා.
මෙලෙස රක්ෂිත බන්ධනාගාරගත කර ඇත්තේ, පුත්තලම ප්‍රදේශයේ පදිංචි එකම පවුලේ අභිකුණ්ඨක ශාස්ත්‍රකරුවෙකු සහ ශාස්ත්‍රකාරියන් දෙදෙනෙක්.
මොවුන් කොච්චිකඩේ ප්‍රදේශයේ ධනවත් ව්‍යාපාරික පවුලක් රවටා යාග හෝම පැවැත්වීම සඳහා මුදලින් රුපියල් ලක්ෂ 11ක් සහ ලක්ෂ 07ක් වටිනා ස්වර්ණාභරණ ලබාගෙන පළා ගිය බවට පොලිසියට ලද පැමිණිල්ලකට අනුවයි අභිකුණ්ඨක ශාස්ත්‍රකරුවන් අත්අඩංගුවට ගෙන ඇත්තේ.
අදාල ධනවත් පවුලේ දියණියන් දෙදෙනාට මාරක අපල ඇති බවට පවසමින් සති දෙකක කාලයක් පුරා නිවසෙහි ශාන්තිකර්මයක්ද සිදු කර ඇති අතර, අභිකුණ්ඨකයින් එහි දී ප්‍රකාශ කර ඇත්තේ, පූජා වට්ටිවල ස්වර්ණාභරණ සහ මුදල් තබා අවසන් ශාන්තිකර්මය සිදු කළ යුතු බවට යි.
එහිදී ශාන්තිකර්මය අතරතුර අලුයම් කාලයේදී අභිකුණ්ඨක ශාස්ත්‍රකරුවන් මුදල් සහ රන් ආභරණ රැගෙන පළාගොස් ඇති බවයි පොලිසිය පවසන්නේ.
