සෑම වසරකම අප්‍රේල් 27 වනදාට යෙදෙන කපුටන් අගය කිරීමේ අන්තර් ජාතික දිනය අදට යෙදී තිබෙනවා.
‘කොර්විඩේ’ කුරුළු පවුලට අයත් කුරුළු වර්ගයක් වන කපුටන් කෑදර පක්ෂීයෙකු ලෙස හැදින්වෙනවා.
ඔවුන් කුණු කසළ, මෘත ශරීර පවා ආහාරයට ගන්නා අතර මරණයේ පෙර නිමිත්තක් එනම් විනාශකාරී සත්වයෙක් ලෙසද සලකනවා.
ලොව පුරා සංස්කෘතික කථාවල කළු කපුටන් අශුභ ලකුණක් ලෙස හැදින්වෙන අතර යන්ත්‍ර මන්ත්‍ර හා හදිහූනියම්වලදීද කපුටු පක්ෂියා ගැන කියැවෙනවා.
සෙනසුරු අපලය වැනි අපල උපද්‍රවවලින් මිදීම සඳහා කිරිබත් ගුලි ගසා කපුටන් හට කෑමට ලබාදීමෙන් එම අපල උපද්‍රව දුරුවන බවට ජනතාව අතර විශ්වාසයක් පවතිනවා.
කෙසේවෙතත් කපුටා යනු තීක්ෂණ බුද්ධියක් ඇති පක්ෂියෙකු ලෙස පරීක්ෂණවලදීද ඔප්පුකර තිබෙනවා.
ඇතැම් පුද්ගලයින් පුහුණු කළ කපුටන් විවිධ සොරකම්වලටද යොදාගත් අවස්ථාවන් අපරාධ වාර්තාවලද දැක්වෙනවා.
මීට පෙර මෙරට තුළ ජාත්‍යන්තර කපුටු දිනයට එතරම් වැදගත්කමක් නොලැබුණත් හිටපු මුදල් අමාත්‍යවරයා හට ‘කපුටා’ යන නාමය පටබැදී ඇති නිසාවෙන් කපුටන් අගය කිරීමේ අන්තර්ජාතික දිනය මේ වන විට මෙරට කාගේත් අවධානයට යොමුව තිබෙනවා.
එමෙන්ම බැසිල් රාජපක්ෂ මහතාගේ උපන් දිනයද අද දිනට යෙදී තිබීම විශේෂත්වයක්.
