තමන් රනිල් වික්‍රමසිංහ මහතාගේ ආණ්ඩුවට එක්වී අමාත්‍ය ධූරයක්ද භාරගන්නා බවට සමගි ජනබලවේගය පක්ෂයේ පාර්ලිමේන්තු මන්ත්‍රී හරීන් ප්‍රනාන්දු මහතා පවසනවා.
ස්වර්ණවාහිනී නාලිකාවේ ‘ඉර’ වැඩසටහනට එක්වෙමින් අමාත්‍යවරයා සඳහන් කළේ අග්‍රාමාත්‍ය රනිල් වික්‍රමසිංහ මහතා ප්‍රමුඛ නව රජය තුළ සමගි ජන බලවේගයට අමාත්‍ය ධුර හිමිවිය යුතු බවට තමන් විශ්වාස කරන බවයි.
ඒ සම්බන්ධයෙන් තම පක්‍ෂය තීරණයක් ගන්නා තෙක් තවත් දිනක් පමණක් බලා සිටින බවද හරීන් ප්‍රනාන්දු මහතා සදහන් කරනවා.
“සජිත් ප්‍රේමදාස මහතා තමයි මේ රටේ අනාගත නායකයා, ඒ ගැන කිසිම සැකයක් නැහැ, නමුත් මම හිතන්නේ මේ මොහොතේ අපි දේශපාලනය ගැන නොසිතා නව රජයට සහය දිය යුතුයි. තව මාස හයකින් අපිට රටක් නැහැ, මේ අර්බුදය විසඳන්න සජිත් ප්‍රේමදාස සහ අනුර කුමාර දිසානායක මේ අලුත් ආණ්ඩුවට එකතු වෙනවා නම් මම කැමතියි. GotaGoHome ක්‍රියාවලිය සඳහා ඇති ඉල්ලීම් ඇතුළත් කරුණු හතක් ඇතුළත් ලිපියක් අපි අග්‍රාමාත්‍යවරයාට යවලා තියෙනවා. අපිට ධනාත්මක පිළිතුරක් ලැබුණට පස්සේ අපි තීරණයක් ගමු, මේක මගේ තනි තීරණයක් නෙවෙයි. ගෝඨාභය පාස් කරන්න මම ආණ්ඩුවට එකතු වෙන්නේ නැහැ, ඔහු අසාර්ථකයි, දැන් අපිට මේ අසාර්ථක පුද්ගලයාව එළියට යවන්න වෙනවා, නමුත් එය ව්‍යවස්ථාවෙන් සිදු විය යුතුයි. A සැලැස්ම සමගි ජනබලවේගයේ සහය නිල වශයෙන් ලබාගැනීමයි. ඒක සිද්ධ වෙන්නේ නැත්නම් අපිට B සැලැස්මට යන්න වෙනවා.”
