කොළඹ වරාය ආසන්නයේ ගිනි ගැනීමට ලක්වූ රසායන ද්‍රව්‍ය ප්‍රවාහන එක්ස්ප්‍රස් පර්ල් නෞකාවෙන් සිදුවූ පරිසර හානියට, මුහුදේ ජල සාම්පල ලබා ගෙන ඒවා පරීක්ෂා කර ඉදිරි නීතිමය පියවර ගන්නා බව සමුද්‍රීය පරිසර ආරක්ෂණ අධිකාරිය පවසනවා.
එහි සභාපති නීතිඥ දර්ශනී දහදපුර මහත්මිය පවසන්නේ, ඒ සඳහා නිලධාරි කණ්ඩායමක් අදාළ ප්‍රදේශය වෙත පිටත්කර හැරීමට පියවර ගන්නා බවය.
සිංගප්පූරුවේ ලියාපදිංචි “එක්ස්ප්‍රස් පර්ල්” නම් රසායනික ද්‍රව්‍ය ඇතුළු ද්‍රව්‍ය ප්‍රවාහනය කරමින් තිබූ අදාළ නෞකාව කොළඹ වරායට නාවික සැතැපුම් 10ක් පමණ දුරින් වු මුහුදු ප්‍රදේශයේ නැංගුරම් ලා තිබියදී එහි හදිසි ගින්නක් හටගෙන තිබුණි.
ශ්‍රී ලංකා නාවික හමුදාව, ගුවන් හමුදාව සහ වරාය අධිකාරිය එක්ව ගින්න මේ වන විට පාලනය කර ඇති අතර එහි ගබඩා කර ඇති රසායනික ද්‍රව්‍ය හේතුවෙන් අවදානම මෙතෙක් පහව ගොස් නොමැති බව වාර්තා වේ.
නයිට්‍රික් ඇසිඩ් ටොන් 25ක් සහ වෙනත් රසායනික ද්‍රව්‍ය හා රූපලාවන්‍ය ආලේපන ද්‍රව්‍ය සහිත බාහාලුම් 1486ක් සහිත අදාළ නෞකාවේ කාර්ය මණ්ඩල 25 දෙනෙකුගෙන් සමන්විත වන බව නාවික හමුදාව සඳහන් වේ.
නාවික හමුදාවේ හා ශ්‍රී ලංකා වරාය අධිකාරියේ විශේෂඥයින්ගෙන් සමන්විත කණ්ඩායමක් ඊයේ පස්වරුවේ නෞකාවට ඇතුළු වී එහි තත්ත්වය පරීක්ෂා කර ඇති අතර නෞකාවේ තිබූ රසායනික ද්‍රව්‍ය කාන්දුවීමෙන් ගින්න හටගෙන ඇති බවට සැක කරන බව නාවික හමුදා මාධ්‍ය ප්‍රකාශක කපිතාන් ඉන්දික ද සිල්වා මහතා මේ සම්බන්ධයෙන් අදහස් දක්වමින් පවසන ලදි.
සබැඳි පුවත්..
