ජාතික ජන බලවේගයේ නායක අනුර කුමාර දිසානායක ජනාධිපතිවරණයෙන් ජයග්‍රහණය කළහොත් මහමැතිවරණය අවසන් වන තුරු පාලන බලය පවත්වාගෙන යාම සඳහා නව භාරකාර අමාත්‍ය මණ්ඩලයක් නිර්මාණය කරන බව එම පක්ෂයේ විධායක සභික නලින්ද ජයතිස්ස පවසනවා.
අනුර කුමාර දිසානායක ජනපතිවීමෙන් පසුව පුරප්පාඩු වන මන්ත්‍රී අසුන සඳහා කොළඹ දිස්ත්‍රික් මනාප ලැයිස්තුවේ මීළඟට සිටින ලක්ෂ්මන් නිපුණආරච්චි පත්කිරීමට සැලසුම් කර ඇති බව Youtube නාලිකාවක පැවති සාකච්ඡාවට එක්වෙමින් නලින්ද ජයතිස්ස මහතා සදහන් කරනවා.
හරිනි අමරසූරිය, විජිත හේරත් සහ ලක්ෂ්මන් නිපුණආරච්චිට අමතරව ජනාධිපති අනුර කුමාර දිසානායක ගෙන් යුතු කැබිනට්ටුවක් නිර්මාණය කිරීම ජාතික ජනබලවේගය පක්ෂයේ සැලසුම බව ඔහු මෙහිදී අනාවරණය කර තිබෙනවා.
මැතිවරණ ප්‍රචාරක කටයුතු අවසන් කරමින් ජාතික ජන බලවේගය අන්තර්ජාල නාලිකාවක් සමග පැවැත් වූ අවසන් සජීව සංවාදය වන මෙහිදී තවත් වැදගත් කරුණු රැසක් පිළිබඳ කරුණු හෙළි කර තිබෙනවා.
මේ අතර සමගි ජනබලවේගය පක්ෂයේ ජනාධිපතිවරණ අපේක්ෂක සජිත් ප්‍රේමදාස මහතා ජනාධිපතිවරණයෙන් ජයග්‍රහණය කලහොත් ඔහුගෙන් හිස්වන පාර්ලිමේන්තු මන්ත්‍රී ධූරය හිරුණිකා ප්‍රේමචන්ද්‍ර මහත්මිය හට ලැබීමට නියමිතයි.
පසුගිය මහමැතිවරණයේ සමගි ජනබලවේගය පක්ෂයේ කොළඹ දිස්ත්‍රික් ලැයිස්තුවෙන් මීළඟට වැඩිම මනාප ලබාගත් අපේක්ෂකයා වන්නේ හිරුණිකා ප්‍රේමචන්ද්‍ර මහත්මියයි.
කෙසේවෙතත් කුමන අපේක්ෂකයා ජයගත්තද බොහෝදුරට දින කිහිපයක් ඇතුළතදී පාර්ලිමේන්තුව විසුරුවා හැරීමට වැඩි ඉඩකඩක් පවතිනවා.
