පසුගියදා නිමාවට පත්වූ ‘හිරු මෙගා ස්ටාර්’ වැඩසටහනේ ජයග්‍රාහිකාව නිරෝධායන නීති උල්ලංඝනය කරමින් කුරුණෑගල දක්වා රිය පෙරහැරකින් ගමන් කර ඇති බවට තොරතුරු වාර්තා වනවා.
එම තරඟයේ ජයග්‍රාහිකාව වූ නවක රංගන ශිල්පිනී ඩිෂ්නි රාජපක්ෂ හා ඇයගේ නර්තන සහකරු නංවා ගත් රිය පෙරහැරක් මෙලෙස නිරෝධායන නීති උල්ලංඝණය කරමින් ගමන් කර ඇති බවයි අප වාර්තාකරුවන් සදහන් කළේ.
නිරෝධායන ඇඳිරිනීතිය අවසන් කළද තවමත් පළාත් අතර සංචරණ සීමා පනවා ඇති පසුබිමක ඇය බස්නාහිර පළාතේ සිට වයඹ පළාත දක්වා ගමන් කර තිබීම හා ඊට පොලීසියෙන් අවසර ලැබීමද විශේෂත්වයක්.
එමෙන්ම කිසිදු ආකාරයක පෙළපාලි, රැස්වීම්, පාගමන් යනාදිය තවදුරටත් තහනම් කර ඇති තත්ත්වයක් තුළ මෙලෙස ප්‍රධාන මාර්ගයක රිය පෙරහැරකින් ගමන් කිරීමට මෙම කණ්ඩායමකට හැකිවී තිබෙනවා.
රිය පෙරහැරේ ගමන්ගත් නවක නිළි ඩිෂ්නි රාජපක්ෂ හා ඇයගේ නර්තන සහකරු මුව ආවරණයක් හෝ නොපැලද විවෘත පරිසරයක ගමන් කරන ආකාරයද දක්නට ලැබුණු බව අප වාර්තාකරුවන් සදහන් කළා.
