මෙතෙක් ඇෆ්ගනිස්තානයේ තලේබාන් පාලනයට යටත් නොවුණු පන්ජ්ෂීර් පළාත යටත් කර ගැනීම සදහා තලේබාන් සංවිධානය සටන්කරුවන් යවා ඇතැයි වාර්තා වේ.
විදෙස් මාධ්ය සදහන් කළේ මේ වනවිට තලේබාන් සටන්කරුවන් දහස් ගණනක් එම පළාත් සීමාවේ එක් රැස්වී පළාතේ බලය අල්ලා ගැනීම සදහා සටන්වැදීමට සූදානමින් සිටින බවයි.
කාබුල් අගනුවරට ඊසාන දිගින් පිහිටි පන්ජ්ෂීර් පළාත තලේබාන් සටන්කාමීන්ට මෙතෙක් කිසිදිනක බලය අල්ලා ගැනීමට හැකිවූ ප්රදේශයක් නොවේ.
මුජහිදීන් සංවිධානයේ බලය යටතේ පවතින එම පළාතේ නායකයා ලෙස කටයුතු කළේ අහමඩ් ෂා මෂූඩ් වන අතර පසුව ඔහු අල්කයිඩා සංවිධානය විසින් ඝාතනය කරනු ලැබිණ.
මේ වනවිට ඔහුගේ පුත් ෂා මෂුඩ් එහි පාලකයා වන අතර විදෙස් මාධ්ය වාර්තා කළේ, ඇෆ්ගනිස්තානයේ පළමු උප ජනාධිපති අමුරුල්ලා සලේ ද ඔහු හා එක්ව සිටින බවයි.
තලේබාන් සංවිධානය අහමඩි ෂා මෂුඩ්ට පවසා ඇත්තේ යටත් වන ලෙස වන අතර ඔහු එය ප්රතික්ෂේප කරමින් සදහන් කර ඇත්තේ තමන් සාම සාකච්ඡාවකට පමණක් සූදානම් බවයි.
මේ පසුබිම තුළ පන්ජ්ෂීර්හි ගැටුමක් ඇවිලීමේ පසුබිමක් නිර්මාණය වී ඇති අතර තම පළාතේ වැසියන් තලේබාන්වරුන් සමග සටනට සූදානම් බව ෂා මෂුඩ් පවසා තිබේ.
විදෙස් මාධ්ය වාර්තා කළේ ඇෆ්ගනිස්තානයේ විවිධ ප්රදේශවල විසිරී සිටින තලේබාන් විරෝධී මුජහිදීන් ඇතුළු විවිධ සංවිධානවල සාමාජිකයන් සිය ගණනක්ද මේ වනවිට පන්ජ්ෂීර් වෙත පැමිණ ඇති බවයි.