ත්රිකුණාමලයේ තෙල් ටැංකි හා අක්කර 33000ක භූමියක් ඇමරිකාවට බදුදීමට තමන් කැබිනට් මණ්ඩල පත්රිකාවක් ඉදිරිපත් නොකළ බව බලශක්ති අමාත්‍ය උදය ගම්මන්පිළ මහතා පවසනවා.
එමෙන්ම, එසේ ඉදිරිපත් කළේ නම්, එහි පිටපතක් ඉදිරිපත් කරන ලෙස දූෂණ විරෝධි හඬ සංවිධානයේ කැඳවුම්කරු වසන්ත සමරසිංහ මහතාට ඔහු අභියෝග කර සිටිනවා.
දූෂණ විරෝධී හඬ සංවිධානයේ කැඳවුම්කරු, ජවිපෙ දේශපාලන මණ්ඩල සභික වසන්ත සමරසිංහ මහතා විසින් මාධ්‍ය හමුවක් පවත්වමින් තමන් පිළිබඳ අසත්‍ය කරුණු රාශියක් ප‍්‍රකාශ කර ඇති බවයි ඔහු පෙන්වා දෙන්නේ.
ත්රිකුණාමලය තෙල් ටැංකි සංකීර්ණය ජවිපෙ සටන් සගයා වන එක්සත් ජාතික පක්ෂය විසින් 2003 වසරේ දී ඉන්දියාවට වසර 35කට බදු දී ඇති බැවින් එම ටැංකි නැවත තවත් රටකට බදු දීමේ හැකියාවක් නොමැති බව වසන්ත සමරසිංහ මහතාට නොතේරිම පුදුම සහගත බවත් 2003ට 35ක් එකතු කළ විට පිලිතුර 2038 බවත් අපි තවමත් ඉන්නේ 2021 වසරේ බව වසන්ත සමරසිංහ මහතා නොදන්නා බවත් උදය ගම්මන්පිළ මහතා පවසනවා.
ත්රිකුණාමල වරාය ඇමෙරිකාවට බදු දීමට නම් ඒ සඳහා අමාත්‍ය මණ්ඩල පත්රිකාවක් ඉදිරිපත් කළ යුත්තේ වරාය ඇමති මිස බලශක්ති ඇමති නොවන බව හිටපු පාර්ලිමේන්තු මන්ත‍්‍රිවරයකු වන වසන්ත සමරසිංහ මහතා නොදැන සිටීම හාස්‍යජනක යැයි ද ඇමෙරිකාවට බදු දීමට තබා දේශීය අවශ්‍යතාවයකට භාවිතා කිරීමටවත් බලශක්ති අමාත්‍යාංශය සතුව ත්රිකුණාමලයේ අක්කර 33,000ක් නොමැති බවත් අක්කර 33,000ක් යනු ගම්මාන රාශියක් පුරා පැතිරෙන දැවැන්ත ඉඩමක් බවත් සමරසිංහ මහතාගේ සාමාන්‍ය දැනීම සඳහා දැනුම් දෙන බවද හෙතෙම සඳහන් කරන ලදි.
