පාර්ලිමේන්තු මන්ත්‍රී ජානක තිස්ස කුට්ටිආරච්චි මහතා පසුගියදා අයවැය දෙවන වර කියැවීමේ විවාද අවස්ථාවකදී සිදුකල ප්‍රකාශයක් සම්බන්ධයෙන් කතානායක මහින්ද යාපා අබේවර්ධන අද (23) පාර්ලිමේන්තුවේදී දැඩි ලෙස අවවාද කළා.
ඒ පාර්ලිමේන්තු මන්ත්‍රී තිස්ස කුට්ටිආරච්චි මහතා විසින් සමගි ජන බලවේගයේ මන්ත්‍රී රෝහිණී කවිරත්නට අදාළව සිදුකල අසභ්‍ය ප්‍රකාශයකට අදාලවයි.
මෙවැනි තත්ත්වයන් ඉදිරියේ ඇතිවීම වළක්වා ගැනීම සඳහා දෙපාර්ශවයේ ම ප්‍රධාන සංවිධායකවරුන් විසින් තම පක්ෂයේ මන්ත්‍රීවරුන් දැනුවත් කරන ලෙස ද කතානායකවරයා දැනුම් දුන්නා.
කෙසේවෙතත් තමන් කාන්තාවන්ට අපහාස වන ආකාරයේ ප්‍රකාශයක් පාර්ලිමේන්තු සභාව තුළ නොකළ බව ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රි ජානක තිස්ස කුට්ටිආරච්චි මහතා පවසනවා.
තමන් එලෙස අසභ්‍ය වචනයක් කීවේ නම් එය කුමක්දැයි තමන්ට වටහා දෙන ලෙසට කුට්ටිආරච්චි මන්ත්‍රීවරයා විපක්ෂයෙන් ඉල්ලා සිටියා.
තමන් කිසිදු අසභ්‍ය වචනයක් කාන්තාවන්ට එරෙහිව සිදු නොකළ බැවින් තමන් කිසිසේත් සමාව ගැනීමට තමන් සූදානම් නොමැති බව තිස්ස කුට්ටිආරච්චි මහතා සදහන් කළා.
මේ අතර පාර්ලිමේන්තු මන්ත්‍රීවරියන්ගේ සංසදයේ සභාපතිනි විශේෂඥ වෛද්‍ය අමාත්‍ය සුදර්ශනී ප්‍රනාන්දුපුල්ලේ මහත්මිය නැගී සිටිමින් කතානායකවරයාගෙන් ඉල්ලා සිටියේ කාන්තා මන්ත්‍රීවරියන්ගේ ගෞරවය පාර්ලිමේන්තුව තුළ රැක දෙන ලෙසයි.
මන්ත්‍රීවරුන්ගේ මෙවැනි හැසිරීම් හා සෘජු හෝ වක්‍ර අසභ්‍ය ප්‍රකාශ මගින් කාන්තාවන්ට සිදුකරන මෙවැනි අපහාස තමන් කිසිසේත් අනුමත නොකරන බව ඇය වැඩිදුරටත් සඳහන් කළා.
මෙහිදී තවත් පාර්ලිමේන්තු මන්ත්‍රීවරුන් රැසකගෙන් පාර්ලිමේන්තු මන්ත්‍රී තිස්ස කුට්ටිආරච්චි මහතාට විවේචන එල්ල වුණා.
ඊට අදාළ දර්ශන පහතින්,
