මෙරට විදුලි බලාගාරවලට ගෑස් සැපයීම සම්බන්ධයෙන් රටට අවාසිදායක ගිවිසුම්වලට බලශක්ති අමාත්යවරයා ලෙස තමන් අත්සන් නොකරන බව අමාත්ය උදය ගම්මන්පිල මහතා පවසනවා.
බලශක්ති අමාත්යාංශයේ අද පැවති ප්රවෘත්ති සාකච්ඡාවකදි ඔහු වැඩිදුරටත් කියා සිටියේ ඇතැම් ජාත්යාන්තර ගිවිසුම් දිනකින් දෙකකින් අත්සන් තබන අතර ඒවායෙන් රටට වෙන අහිතකර බලපෑම් පිළිබද අවධානය යොමු නොකෙරෙන බවයි.
එසේම ශ්රී ලංකාවේ මන්නාරම් ද්රෝනියේ තමන් ඇතුළු බලශක්ති අමාත්යාංශය කැනීම් සිදුකිරීමට වැඩපිළිවෙළක් අරඹා ඇති අවස්ථාවක මෙලෙස මෙරට විදුලි බලාගාරවලට ගෑස් සැපයීම වසර 5ක කාලයකට අමෙරිකානු සමාගමකට ලබාදීම තුළ මෙරට ගෑස් කැනීම් සදහා ආයෝජකයින් පැමිණීමට බාධා එල්ල වන බවද අමාත්යවරයා සදහන් කළා.
ප්රවෘත්ති සාකච්ඡාවේදි අදහස් දැක්වූ බලශක්ති අමාත්ය උදය ගම්මන්පිල මහතා,
” නිව් ෆෝට්ට්රස් එනර්ජි සමාගමට ගෑස් සැපයීම ආරම්භ වෙන්නේ 2023 ඉදලා වසර 05කට. 2023 ඉදලා 2028 දක්වා තමයි ඒ අය ගෑස් සපයන්නේ. අපි හිතනවා මේ අවුරුද්දේ අග අපි වෙන්සේදිය පැවැත්වුවහොත් එතන ඉදලා වසර 03කදි අපෙව් රටේ ගෑස් නිෂ්පාදනය ආරම්භ කරන්න පුළුවන්. ඒ කියන්නේ 2022 ඉදලා ගත්තොත් 2025 සිට අපිට ගෑස් නිෂ්පාදනය ආරම්භ කරන්න පුළුවන්. හැබැයි අපේ විදුලි බලාගාරවලට ගෑස් සැපයීම 2028 දක්වා අමෙරිකානු සමාගමකට ලබාදීම ශ්රී ලංකාවේ ගෑස් නිධි කැනීමට විදේශික ආයෝජකයින් ගෙන්වා ගැනීමට බාධකයක් ලෙස බලශක්ති අමාත්යවරයා ලෙස මම දකිනවා. මේ පිළිබද සාකච්ඡා වෙච්ච සෑම අවස්ථාවකම අපේ අමාත්යාංශයට ඒක බලපාන ආකාරය ගැන අපි ලිඛිතව අමාත්ය මණ්ඩලයට දැනුම්දීලා තියෙනවා. අපිට ප්රශ්නය තියෙන්නේ යුගදනවි බලාගාරයේ 40% කොටස් නිව් ෆෝට්ට්රස් සමාගමට දීම නෙමේයි. ශ්රී ලංකාවේ ගෑස් සැපයීමේ ඒකාධිකාරය 2023 සිට වසර 05කට අමෙරිකානු සමාගමකට හිමිවීම. ඒ වගේම ටෙන්ඩරයක් ක්රියාත්මක වෙමින් තිබෙද්දි අපිට ප්රශ්නයක් තියෙනවා ගෑස් විෂය පිළිබද දන්න අය ඉන්නේ අපේ අමාත්යාංශයේ නමුත් ඔය ගිවිසුම්වලට එළඹීම සම්බන්ධයෙන් වූ කිසිදු කමිටුවක අපේ අමාත්යාංශ නියෝජිතයෝ හිටියේ නැහැ. අපි අමාත්යාංශය හැටියට මේ පිළිබද විශය දන්න අය හැටියට අමාත්ය මණ්ඩලයට නිරීක්ෂණ දෙකක් ලබාදීලා තියෙනවා. තව නිරීක්ෂණයක් ලබාදෙන්න මං බලාපොරොත්තු වෙනවා. “