මාධ්‍යවේදී තරිඳු ජයවර්ධන හට ජ්‍යේෂ්ඨ නියෝජ්‍ය පොලිස්පති දේශබන්දු තෙන්නකෝන් විසින් එල්ල කරන ලද තර්ජනය පිළිබඳව විපක්ෂනායක සජිත් ප්‍රේමදාස මහතා විසින් අද (06) දින පාර්ලිමේන්තුවේ අවධානය යොමු කර සිටියා.
මාධ්‍යවේදී තරිඳු ජයවර්ධන විසින් ෆේස්බුක් සමාජ මාධ්‍ය ජාලයේ බෙදාගන්නා ලද ප්‍රවෘත්තියකට ප්‍රතිචාර දක්වමින් බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් මහතා විසින් පසුගියදා අනියම් ආකාරයට සිදුකර ඇති තර්ජනය සම්බන්ධයෙන් මාධ්‍ය සංවිධාන එකතුව විසින්ද සිය විරෝධය පලකර ඇති බවත් මේ සම්බන්ධයෙන් පොලිස්පතිවරයා වෙත පැමිණිල්ලක් යොමුකර ඇති බවත් විපක්ෂනායකවරයා විසින් මෙහිදී පෙන්වා දෙනු ලැබුවා.
මාධ්‍යවේදී තරිඳු ජයවර්ධන විසින් අසත්‍ය ප්‍රවෘත්ති පළ කරන ලද බවත්, ඒවාට අදාළව සොබාදහම දඬුවම් කරනු ඇති බවත් දිගින්-දිගටම සඳහන් කර ඇති ජ්‍යෙෂ්ඨ නියෝජ්‍ය පොලිස්පතිවරයා, ප්‍රභාකරන්ට සහ අනෙකුත් අපරාධකරුවන්ට සිදුවූයේ කුමක් දැයි බලන ලෙස අවධාරණයෙන් කියා සිටින බවද තරිඳු ජයවර්ධන හට ප්‍රකාශ කර ඇති බව සජිත් ප්‍රේමදාස මහතා විසින් කථානායකවරයාගේ අවධානයට ලක් කරනු ලැබුවා.
ආරක්ෂක ක්ෂේත්‍රයේ පුද්ගලයෙකු විසින් නිදහස් මාධ්‍යවේදියෙකුට සිදුකර ඇති මෙම අනියම් තර්ජනයෙහි බරපතල අනතුරු ඇඟවීමක් ගැබ්ව ඇති බවත් මේ සම්බන්ධයෙන් පරීක්ෂණයක් විභාග වන්නේද යන්න රජයේ පාර්ශවයෙන් විමසා සිටින බවත් ප්‍රකාශ කළ විපක්ෂනායකවරයා අවසන් වශයෙන් අවධාරණය කර සිටියේ මාධ්‍යවේදී තරිඳු ජයවර්ධන හට කිසියම් හානියක් සිදුවුවහොත් එහි සම්පූර්ණ වගකීම රජය විසින් භාරගත යුතු බවයි.
