රාජ්‍ය ඇමති ලොහාන් රත්වත්තේ මහතා සමග වැලිකඩ බන්ධනාගාරය තුළට තමන් ගිය බවට වාර්තා වන තොරතුරු අසත්‍ය බව 2021 ශ්‍රී ලංකාවේ විවාහක රූ රැජින වන පුෂ්පිකාද සිල්වා මහත්මිය පවසනවා.
දෙරණ මාධ්‍ය ජාලයේ අධිපති දිලිත් ජයවීර මහතා වෙත ලිපියක් යොමු කරමින් ඇය පවසා සිටින්නේ සැප්තැම්බර් 14වනදා පුවත් විකාශයේදී තමන් එසේ බන්ධනාගාරය වෙත ගිය බවට හැඟවෙන ලෙස වාර්තා කිරීමක් සිදුකර ඇති බවයි.
එහිදී තමාගේ ඡායාරූපයක්ද බොඳ කර භාවිතා කරමින් “රාජ්‍ය අමාත්‍යවරයා සමඟ වැලිකඩ බන්ධනාගාරයට ගිය විවාහක රූ රැජිණ” යැයි එහිදී පැවසූ බවත් ඇය එම ලිපියෙන් පෙන්වා දෙනවා.
අදාල සිද්ධියට තමා කිසිසේත්ම සම්බන්ධ නොමැති බවත් දෙරණ සියළුම පුවත් විකාශ (මධ්‍යහන 12, පස්වරු 6.55, පස්වරු 10) හරහා සහ ඩිජිටල් මාධ්‍ය හරහා මෙය නිවැරදි කළ යුතු බවත් නොඑසේ නම් දෙරණ නාලිකාවට එරෙහිව නඩු මාර්ගයෙන් කටයුතු කිරීමට නීතීඥවරුන් දැනුවත් කරන බවත් ඇය අවධාරණය කර සිටිනවා.
