ජනාධිපතිවරයාට අපහාස වන ලෙස සමාජ ජාලා මාධ්යයෙන් හෝ වෙනත් මාධ්යයකින් ප්රකාශ නිකුත් කිරීම හෝ හුවමාරු කිරීමක් සිදුකල නොහැකි යැයි පොලිස් මාධ්ය ප්රකාශක නිහාල් තල්දූව මහතා පවසනවා.
කිසියම් අයෙකු එසේ කළහොත් එම පුද්ගලයාට එරෙහිව නීතිය මගින් කටයුතු කිරීමේ හැකියාව පොලීසියට ඇති බවයි පොලිස් මාධ්ය ප්රකාශකවරයා සදහන් කරන්නේ.
ජනාධිපතිවරයා මිරිහාන ප්රදේශයෙන් ගමන් කරමින් සිටියදී ඔහුට අපහාස වන අයුරින් පිරිසක් හූ කීමේ සිදුවීමට අදාළ දෑ සමාජ මාධ්ය තුළ හුවමාරු කිරීම සම්බන්ධයෙන් කාන්තාවක් අත්අඩංගුවට ගැනීමේ සිදුවීම පිළිබදව අදහස් දක්වමින් නිහාල් තල්දූව මහතා මෙම අදහස් පලකළා.
මෙම සිදුවීමට මුහුණ පෑ කාන්තාව සදහන් කළේ සමාජ මාධ්ය ජාලයක් හරහා හුවමාරු වූ ඡායාරූප අඩංගු සිද්ධියක් සම්බන්ධයෙන් අපරාධ පරීක්ෂණ දෙපාර්තමේන්තුව අපරාධකාරියක් අත්අඩංගුවට ගන්නා ආකාරයෙන් තමන් අත්අඩංගුවට ගෙන ප්රකාශයක් සටහන් කරගත් බවයි.
එහිදී පොලිස් නිලධාරීන් තමන්ගේ ජංගම දුරකතනයේ දත්තද ලබාගෙන මෙවැනි ක්රියාවන් නැවත සිදු නොකරන ලෙසට අවවාද කළ බවද ඇය සදහන් කරනවා.
කෙසේ වෙතත් මේ සම්බන්ධයෙන් අදහස් දක්වමින් නීතිඥ තිෂ්ය වේරගොඩ මහතා පවසන්නේ පොලිස් මාධ්ය ප්රකාශකවරයාගේ ප්රකාශය සම්පූර්ණ අසත්යක් බවයි.
වාහලතන්ත්රී එදිරිව පොලිස්පති (SC/FR/768/2009) නඩුවේ තීන්දුව උපුටා දක්වමින් ඒ මහතා පෙන්වා දෙන්නේ රාජ්ය නායකයින්ව හාස්යට, උපහාසයට හෝ අපහාසයට ලක්කිරීම අපරාධමය වරදක් නොවන බවයි.
එමෙන්ම මෙවන් හේතුවක් පාදක කරගෙන යම් කිසි පුද්ගලයෙකුගේ ජංගම දුරකථනයේ දත්ත පිටපත් කරගැනීමේ හැකියාවක් අපරාධ පරීක්ෂණ දෙපාර්තමේන්තුවට නොමැති බවද නීතීඥ තිෂ්ය වේරගොඩ මහතා සදහන් කරනවා.