භාණ්ඩ 623 ක් සඳහා පැනවූ ආනයන සීමා කිරීම් වලට පෙර මාස 03ක පමණ කාලයක් ඒ සම්බන්ධව අධ්‍යනයක් කළ බව ශ්‍රී ලංකා මහබැංකු අධිපති මහාචාර්ය ඩබ්ලිව්.ඩී. ලක්ෂ්මන් මහතා පවසනවා.
අදාල භාණ්ඩ ආනයනය කිරීමේදී බලපත්‍රලාභී වාණිජ බැංකු සහ ජාතික ඉතිරි කිරීමේ බැංකුවේ ණයවර ලිපි සහ ප්‍රතිග්‍රහණය මත ලියවිලි නිකුත් කිරීම සඳහා 100%ක ආන්තික මුදල් තැන්පතුවක් සිදු කළ යුතු බවයි මහ බැංකුව පෙරේදා (09) නිවේදනය කර සිටියේ.
මේ සම්බන්ධයෙන් අදහස් දක්වන මහබැංකු අධිපතිවරයා පවසන්නේ වෙළෙඳ හිඟයේ පරතරය අඩු කර ගැනීම මෙහි අරමුණ බවයි.
මෙම ක්‍රමවේදය අතීතයේත් මහ බැංකුව ආනයන පාලනය කිරීමට ගත් ක්‍රියාමාර්ගයක් වන බවත් කිසිදු නිෂ්පාදකයෙක් මේ සම්බන්ධයෙන් මැසිවිලි නගන්නේ යැයි තමා නොසිතන බවත් ඔහු පවසනවා.
එමෙන්ම, ආනයන සීමා කිරීම් ඉතාමත් ප්‍රවේසමෙන් කල් රැගෙන සිදුකළ දෙයක් බවයි මහබැංකු අධිපතිවරයා පවසන්නේ.
කෙසේ වෙතත්, තමන් මහබැංකු අධිපති ධුරයෙන් ඉවත් වන බව මහාචාර්ය W.D. ලක්ෂ්මන් මහතා ඊයේ දින නිවේදනය කර සිටියා.
පසුගිය සති කිහිපයේ ඇතිවූ සිත්රිදවීම් තමාගේ විශ්‍රාම යෑම ඉක්මන් කළ බවත් තමා වෙහෙස වී කටයුතු කළත් තමන්ගේ පාලනයෙන් බැහැරව ඇති බලවේගයන් නිසා අපේක්ෂා කළ ප්‍රතිඵල ලබාගැනීමට නොහැකිවූ බවත් එම නිවේදනයේදී ඔහු ප්‍රකාශ කර සිටියා.
