අත්‍යවශ්‍ය ඖෂධ නොමැතිව සෞඛ්‍ය පද්ධතිය කඩා වැටීම, එයින් ජන ජීවිතයට ඇති අවධානම, සෞඛ්‍ය සේවාව කප්පාදු කිරීමට එරෙහිවීම වැනි ඉල්ලීම් කිහිපයක් මුල් කරගනිමින් රජයේ වෛද්‍ය නිලධාරීන්ගේ සංගමය අද (06) උද්ඝෝෂණයක් සංවිධානය කර තිබුණා.
කොළඹ ජාතික රෝහලේ සිට සෞඛ්‍ය අමාත්‍යාංශය දක්වා පාගමනින් පැමිණි පිරිස සෞඛ්‍ය අමාත්‍යාංශය ඉදිරියේ සුළු උද්ඝෝෂණයක් පවත්වා විසිර ගියා.
මීට පෙර යහපාලන රජය පැවති කාලය තුළ ඉතා සක්‍රීය වෘත්තීය සමිතියක් වූ රජයේ වෛද්‍ය නිලධාරීන්ගේ සංගමය සෞඛ්‍ය සේවාවේ ගැටළුවලට අමතරව ඔවුන්ගේ වෘත්තීය සමිතියට ඍජුව අදාළ නොවන දේශපාලන ගැටලු ගණනාවක් සම්බන්ධයෙන් උද්ඝෝෂණ හා වැඩවර්ජන සංවිධානය කළා.
එවක ඉතා ක්‍රියාශීලි වෘත්තීය සමිති නායකයෙකු වූ රජයේ වෛද්‍ය නිලධාරීන්ගේ සංගමයේ සභාපති විශේෂඥ වෛද්‍ය අනුරුද්ධ පාදෙණිය මහතා මේ වන විට සාමාජිකයන්ට පවා සොයා ගැනීමට නොහැකි තත්ත්වයක් උදාවී තිබෙනවා.
සාමාන්‍ය ජනතාව අසීමිතව දුක් විදිමින් සිටින අවස්ථාවක මෙම අර්බුදය සම්බන්ධයෙන් ඔවුන් කිසිදු ක්‍රියාමාර්ගයක් නොගැනීම විශේෂත්වයක්.
අනුරුද්ධ පාදෙණිය මහතාගේ මෙම ක්‍රියාකලාපය හේතුවෙන් රජයේ වෛද්‍ය නිලධාරීන්ගේ සංගමයේ සාමාජිකයින් මේවන විට දැඩි කළකිරීමකට පත්ව තිබෙනවා.
මෙරට පැරණි හා ශක්තිමත් වෘත්තීය සංගමයක් වූ රජයේ වෛද්‍ය නිලධාරීන්ගේ සංගමය මේ වන විට සමාජ මාධ්‍ය තුළද හාස්‍යයට ලක්වන වෛද්‍ය සංගමයක් බවට පත්ව ඇත්තේ එහි සභාපතිවරයාගේ ආණ්ඩු ගැති ක්‍රියාකලාපය හේතුවෙන් බව එහි ඇතැම් සාමාජිකයන් පවසනවා.
විෂ පොල්තෙල් සම්බන්ධයෙන් ආණ්ඩුවට චෝදනා එල්ලවන විට නිවසේදීම පොල්තෙල් සාදාගන්නා ආකාරය රජයේ වෛද්‍ය නිලධාරීන්ගේ සංගමය නිවේදනය කිරීම, අනුරුද්ධ පාදෙණිය මහතා කාබනික පොහොර ප්‍රවර්ධනය කර මෙරට ආහාර අර්බුදයට දායකවීම, වරෙක පසේ සංයුතිය පිළිබඳව දෙරණ නාළිකාවේදී පාංශු විශේෂඥයින්ට කියාදීමට ගොස් විහිළුවක් වීම වැනි චෝදනා රැසක් රජයේ වෛද්‍ය නිලධාරීන්ගේ සංගමයට මේ වන විට එල්ලවී තිබෙනවා.
