බංග්ලාදේශයට එරෙහිව කාන්පූර්හිදී පැවැත්වෙන දෙවැනි හා අවසන් ටෙස්ට් ක්‍රිකට් තරගයේදී ක්‍රිකට් පිටියේ සුවිශේෂී වාර්තා දෙකක් අලුත් කිරීමට ඉන්දියාව අද (30) සමත්වුණා.
ඒ අනුව, ටෙස්ට් ක්‍රිකට් පිටියේ කණ්ඩායමක් වාර්තාකළ වේගවත්ම ශතකය හා වේගවත්ම අර්ධ ශතකය අලුත් කළා.
ඉන්දියාව පන්දුවාර 10.1කින් ශතක කඩයිම පසුකර ගියා.
කෙසේ නමුත්, මෙහි පෙර වාර්තාවද ඔවුන් සතුවම තිබුණා.
ඔවුන් මීට පෙර වේගවත්ම ටෙස්ට් ශතකය 2023 වසරේදී බටහිර ඉන්දීය කොදෙව්වන්ට එරෙහිව කොදෙව් දූපත්හිදී පැවති තරගයේ දී ක්‍රීඩාකර තිබුණා.
එවර ඉන්දියාව පන්දුවාර 12.2කින් ශතකය සම්පූර්ණ කර තිබුණා.
එමෙන්ම ඉන්දියාව මෙම ඉනිමේදී අර්ධ ශතක සීමාවද පන්දුවාර 3කදී සම්පූර්ණ කිරීමට සමත් වුණු අතර, එයද ටෙස්ට් ක්‍රිකට් පිටියේ වේගවත්ම අර්ධ ශතකය වුණා.
ඉන්දියාව බිඳදමනු ලැබුවේ මෙම වසරේදීම එංගලන්තය විසින් බටහිර ඉන්දීය කොදෙව්වට එරෙහිව පන්දුවාර 4.2කදී පිහිටුවා තිබූ වාර්තාවයි.
මේ අතර, ඉන්දියාව මීට පෙර ක්‍රිකට් ක්‍රීඩාවේ කිසිදු ආකෘතියක පන්දුවාර 3කදී අර්ධ ශතකය සම්පූර්ණ කර නොමැතිවීමද විශේෂත්වයක්.
ඔවුන් මීට පෙර ක්‍රීඩාකර තිබූ වේගවත්ම අර්ධ ශතකය වූයේ පසුගිය වසරේ ආසියානු ක්‍රීඩා උළෙලේ දී බංග්ලාදේශයට එරෙහිව පන්දුවාර 3.4කදී අර්ධ ශතකය සම්පූර්ණ කිරීමයි.
දින දෙකකට වැඩි කාලයක් වර්ෂාවෙන් බාධා එල්ල වූ මෙම තරගයේ පළමුව පන්දුවට පහරදුන් බංග්ලාදේශය අද (30) දිනයේදී සිය පළමු ඉනිමට සියලුදෙනා දැවී ලකුණු 233ක් රැස්කළා.
ඉන් අනතුරුව පන්දුවට පහරදීම ඇරඹූ ඉන්දියාව, සිය පළමු ඉනිමට පන්දුවාර 34.4ක් ක්‍රීඩාකර කඩුලු 09ක් දැවී ලකුණු 285ක් රැස්කර ඉනිම අත්හිටුවනු ලැබුවා.
ඒ වනවිට ඔවුන් බංග්ලාදේශ පළමු ඉනිමට වඩා ලකුණු 52ක් ඉදිරියෙන් සිටියා.
ඉන්දීය ඉනිම වෙනුවෙන් යෂස්වි ජයිස්වාල් පන්දු 51කින් ලකුණු 72ක්ද, කේ. එල්. රාහුල් පන්දු 43කින් ලකුණු 68ක්ද, විරාත් කෝලි පන්දු 35කින් ලකුණු 47ක්ද රැස්කිරීමට සමත් වුණා.
