ඉන්දිය රජයේ නියෝජිතයින් සිව් දෙනෙකු දිවයිනට පැමිණ තිබෙනවා.
ඒ මෙරටට ලබා දෙන ඉදිරි ආධාර සැපයීම පිළිබඳව සාකච්ඡා කිරීම සඳහායි.
ඉන්දීය විදේශ ලේකම් විනේ ක්වාත්‍රා මහතායි මෙම ධුත පිරිසේ නායකත්වය දරන්නේ.
ඉන්දීය මුදල් අමාත්‍යාංශයේ ආර්ථික කටයුතු දෙපාර්තමේන්තුවේ ලේකම් අජේ සෙත් මහතා, ඉන්දීය රජයේ ප්‍රධාන ආර්ථික උපදේශක ආචාර්ය වී. අනන්ත නාගේෂ්වරන් මහතා සහ ඉන්දීය විදේශ කටයුතු අමාත්‍යාංශයේ ඉන්දීය සාගර කලාපයේ සම ලේකම් කාර්තික් පාන්ඩේ මහතා අනෙකුත් නියෝජිතයන් වනවා.
මෙම පිරිස ඉන්දියාවට අයත් විශේෂ ගුවන් යානයෙන් අද පෙරවරු 09.20 ට ඉන්දියාවේ නවදිල්ලි නුවර සිට කටුනායක ගුවන් තොටුපළ වෙත පැමිණ තිබෙනවා.
ඔවුන් අද පෙරවරුවේ ජනාධිපතිවරයා හමුවූ අතර මේ වනවිට අග්‍රාමාත්‍යවරයා සමග සාකච්ඡාව ආරම්භ වී තිබෙනවා.
තවද, මෙම දූත පිරිස ජ්‍යෙෂ්ඨ නිලධාරීන් සමග එක්ව මෙරට ආර්ථික තත්ත්වය සහ කෙටි කාලීන හා දීර්ඝ කාලීන සහය පිළිබඳව ද සාකච්ඡා පැවැත්වීමට නියමිතයි.
සමීප මිතුරෙකු ලෙස උද්ගතව ඇති අසීරු අවස්ථාවෙන් මිදීමට ශ්‍රී ලංකාවට ඉන්දීය රජයේ උපරිම සහාය දෙන බව ඉන්දීය විදේශ ලේකම් විනේ ක්වාත්‍රා ජනපති හමුවේ පැවසූ බවත් වාර්තා වනවා.
අග්‍රාමාත්‍ය රනිල් වික්‍රමසිංහ මහතා ඊයේ පාර්ලිමේන්තුවේදී පැවසුවේ, ඉන්දීය ණය ආධාර යටතේ දැනට ඩොලර් බිලියන 4ක පමණ ණය මුදලක් ලබා ගෙන ඇති බවයි.
”අපි ඉන්දියාවෙන් තවත් ණය ආධාර ඉල්ලුම් කරලා තියෙනවා. හැබැයි ඉන්දියාවටත් මේ ආකාරයට දිගින් දිගටම අපිට ණය දෙන්න බැහැ. අනික් අතට අප ලබා ගන්නා ණය ආපසු ගෙවීමේ ක්‍රමවේදයක් තිබිය යුතුයි. නැති වුණොත් කවුරුත් අපිට පිනට සල්ලි දෙන්නේ නැහැ. අපිට පුළුවන් තරම් ඉන්දියාව දුන්නා. දැන් ඉන්දියාවෙ බැංකුවලත් ප්‍රශ්න තියෙනවා”
ඔවුන් අද පස්වරු 06 ට පමණ නැවතත් ඉන්දියාව බලා පිටත්ව යනු ඇති.
