ඉන්දීය විදේශ ලේකම් හර්ෂ් වර්දන් සිංග්ලා ඔක්තෝබර් මස මුල දීම මෙරට සංචාරයක් සඳහා පැමිණීමට නියමිත බව The Hindu පුවත්පත වාර්තා කරනවා.
ශ්‍රී ලංකා සහ ඉන්දීය විදේශ අමාත්‍යවරුන් වන මහාචාර්ය ජී.එල්. පීරිස් සහ එස්. ජයිශන්කර් නිව්යෝක්හි දී එක්සත් ජාතීන්ගේ මහා මණ්ඩල රැස්වීමට සමගාමී ව පැවති හමුවෙන් දින 10කට පමණ පසු ව ඉන්දීය විදේශ ලේකම්වරයාගේ ශ්‍රී ලංකා සංචාරය සිදුවීම විශේෂත්වයක් බවයි ද හින්දු පුවත්පත පවසන්නේ.
ඔක්තෝබර් 2 සහ 5 අතර කාලය තුළ ෂ්‍රිංග්ලා මහතා ප්‍රධාන ද්විපාර්ශ්වික ව්‍යාපෘති කිහිපයක ආරම්භක කටයුතු වෙනුවෙන් ඔහු පැමිණෙන බවට නවදිල්ලියේ සහ කොළඹ නිල ආරංචි මාර්ග සඳහන් කරන නමුත් එම සංචාරයේ මූලික අරමුණ තවමත් අපැහැදිලි බව පුවත්පත පවසනවා.
ශ්‍රී ලංකාව තුළ ඉන්දියාවේ දායකත්වය ලබන ව්‍යාපෘතිවල “මන්දගාමී වේගය” සහ ශ්‍රී ලංකාවේ ආර්ථිකට සහ යටිතල පහසුකම් සඳහා චීනය තීරණාත්මක හා බලගතු පාර්ශවයක් ලෙස නැගී සිටීම පිළිබඳව ඉන්දියාව කණස්සල්ලෙන් සිටින බවත් විදේශ ලේකම්වරයා වශයෙන් ෂ්‍රිංග්ලා මහතා ශ්‍රී ලංකාවට පැමිණි ප්‍රථම අවස්ථාව වන මෙයට තීරණාත්මක හේතූන් පැවතිය හැකි බවත් පැවසේ.
