පාර්ලිමේන්තු මන්ත්‍රීවරුන්ගේ, සමාජ ක්‍රියාකාරීන්ගේ සහ මාධ්‍යවේදීන්ගේ දුරකතන වලට හොර රහසින් ඇතුළුවීම හා සවන්දීම සඳහා රජය විසින් මිලදී ගත් ඔත්තු බැලීමේ මෘදුකාංග භාවිත කළ බවට එල්ල වී ඇති චෝදනා විමර්ශනය කිරීම සඳහා ඉන්දීය අධිකරණය ස්වාධීන මණ්ඩලයක් පත් කිරීමට කටයුතු කර තිබෙනවා.
ශ්‍රේෂ්ඨාධිකරණය මෙම නියෝගය ලබා දීමට කටයුතු කර ඇත්තේ නීතිවිරෝධි නිරීක්ෂණ චෝදනා සම්බන්ධයෙන් විමර්ශනයක් ඉල්ලා ගොනු කර ඇති පෙත්සම් කිහිපයක් විභාගයට ගැනීමෙන් අනතුරුවයි.
ඊශ්‍රායල නිරීක්ෂණ සමාගමක් වන NSO හි දත්ත පද්ධතියක ගබඩා කර තැබූ ඉලක්කගත දුරකථන අංක ලැයිස්තුවක් පසුගිය ජුලි මාසයේ දී ප්‍රධාන පෙළේ මාධ්‍ය මඟින් අනාවරණය කරනු ලැබීමත් සමඟ එයට විශාල අවධානයක් යොමු වනු අතර කීර්තිමත් පුද්ගලයින්ගේ දුරකථනවලට අනවසරයෙන් පිවිසීම පිළිබඳ රජයන් ගණනාවකට චෝදනා එල්ල වුණා.
Pegasus මෘදුකාංගය ඔස්සේ විමර්ශනය කළ ජ්‍යාත්‍යන්තර මාධ්‍ය ආයතන 16 අතරට ඉන්දියාවේ The Indian Express පුවත්පත සහ The Wire වෙබ් අඩවිය ද ඇතුළත්ව තිබුණා.
කෙසේ වෙතත් එම සමාගම සියලු චෝදනා ප්‍රතික්ෂේප කරන අතර මෙම මෘදුකාංගය අපරාධකරුවන් සහ ත්‍රස්තවාදීන් සොයා ගැනීම සඳහා නිර්මාණය කර ඇති බවත් මානව හිමිකම් ආරක්ෂා කිරීම පිළිබඳ යහපත් අතීතයක් ඇති රටවල මිලිටරි නීතිය ක්‍රියාත්මක කරනු ලබන බුද්ධි අංශ වෙත පමණක් විකුණනු ලැබූ බවත් සඳහන් කර තිබෙනවා.
