සමගි ජන බලවේගය නියෝජනය කරන පාර්ලිමේන්තු මන්ත්‍රී කරුණාරත්න පරණවිතාන ඇතුළු පිරිසක් එක්සත් ජාතික පක්ෂය විසින් සංවිධානය කළ සත්‍යග්‍රහයට සම්බන්ධ වී ඇත්තේ සමගි ජන බලවේගයේ අනුමැතියකින් තොරව බැවින් ලබන සතියේ පැවැත්වෙන මන්ත්‍රී කණ්ඩායම් රැස්වීමේ දී මේ සම්බන්ධව දැඩිව සාකච්ඡා කිරීමට අපේක්ෂා කරන බවට වාර්තා වනවා.
චම්පික රණවකගේ 43 සේනාංකය සහ කරුණාරත්න පරණවිතාන මෙම සත්‍යග්‍රහයට එක්වීම පිළිබඳව විපක්ෂ නායක සජිත් ප්‍රේමදාසගේ දැඩි විරෝධය පල වී ඇති නමුත් එම පක්ෂ මන්ත්‍රී කණ්ඩායමේ තවත් පිරිසක් 43 සේනාංකයේ පියවරට ප්‍රසාදය දක්වා ඇතැයි ද පැවසේ.
කෙසේ වෙතත් මේ සම්බන්ධව අදහස් දක්වමින් පාඨලී චම්පික රණවක මහතා පවසන්නේ මේ වන විට රට මුහුණපා ඇති තත්ත්වයෙන් ගොඩ ගැනීමට නම් සියලු පාර්ශව එකට එකතු වී පොදු වැඩපිළිවෙළක් ගොඩනගා ගත යුතු බවයි.
43 වැනි සේනාංකය වශයෙන් තමන් ඇතුළු කණ්ඩායම එක්සත් ජාතික පක්ෂය පමණක් නොව, අනෙකුත් පක්ෂ සමග ද කටයුතු කරන බවත්, 43 සේනාංකයේ සංවත්සර උත්සවයට එජාපයේ නියෝජ්‍ය නායක ඇතුළු පිරිසක් ද සහභාගී වූ බවත් ඔහු වැඩිදුරටත් පෙන්වා දෙනවා.
