පකිස්තානයේ ණය පිළිබද කොමිසම විසින් පසුගිය වසර දෙකක කාලය තුළ සිදුකළ විමර්ශනවලදී ණය, ආධාර ඇතුළු රාජ්‍ය අරමුදල් අවභාවිතා කළ ඇමතිවරුන්, මන්ත්‍රීවරුන් සහ ඉහළ පෙළේ රාජ්‍ය නිලධාරින් 200ක් පමණ පිළිබදව තොරතුරු හෙළිව තිබේ.
එරට මාධ්‍ය වාර්තා කළේ පාලක පීටීයි පක්ෂයට සම්බන්ධ මැති ඇමතිවරුන්, පසුගිය ආණ්ඩුවලට සම්බන්ධව සිටි මැතිඇමතිවරුන් මෙන්ම විශ්‍රාමික මෙන්ම සක්‍රීය රාජ්‍ය සේවයේ ජ්‍යෙෂ්ඨ නිලධාරින් රැසක් ද මෙලෙස චෝදනා එල්ල වී සිටින පිරිස අතර වන බවයි.
සිදුවීම් 56 ක් සම්බන්ධයෙන් සිදුකළ විමර්ශනවලදී මෙම කරුණු අනාවරණය වී ඇති අතර අවභාවිතා කළ මුදල් අතරින් පකිස්තාන රුපියල් බිලියන 350 ක පමණ මුදලක් විවිධ ආයතන සහ පුද්ගලයන් වෙතින් යළි අයකරගැනීමටද බලධාරීන් සමත්ව තිබේ.
සීනි වංචාවක්, තිරිගු පිටි වංචාවක්, උමං මාර්ග ව්‍යාපෘතියක සිදුවූ දූෂණයක්, රැක් රෝපණ ව්‍යාපෘතියක සිදුවූ අයථා ක්‍රියාවක්, මේටරෝ දුම්රිය ඉදිකිරීමට සම්බන්ධ වංචාවක් ආදි වශයෙන් වන මහා පරිමාණ දූෂණ ක්‍රියා රැසක් මෙම පරික්ෂණවලදී විමර්ශනයට ලක්කර ඇති බව සදහන් වේ.
