නෝර්වේ රාජ්‍යය සහ ශ්‍රී ලංකාව අතර අඛණ්ඩ සහයෝගීතාවයක් පවත්වාගත යුතු යැයි තමා විශ්වාස කරන බව නෝර්වේජියානු පාර්ලිමේන්තුවට තේරී පත්වූ කම්සි ගුණරත්නම් පවසයි.
ඒ, පෙරේදා (26) දින විඩියෝ තාක්ෂණය ඔස්සේ මාධ්‍ය හමුවකට එක්වෙමින්.
තමා හට ශ්‍රී ලංකාවේ උපත ලද බැවින්ද, ද්‍රවිඩ බස තම මව් බස බැවින්ද, තමා වසර 13ක් දෙමළ පාසලක උගත් බැවින්ද ශ්‍රී ලංකාව සමඟත් ද්‍රවිඩ ඩයස්පෝරාව සමගත් සමීපව කටයුතු කිරීමට බලාපොරොත්තු වන බවයි ඇය පවසන්නේ.
යුධ අපරාධ සම්බන්ධයෙන් විමර්ශනය විය යුතු බවට තමා විශ්වාස කරන බවත් ශ්‍රී ලංකා රජය විසින් ඒ සම්බන්ධයෙන් ජාත්‍යන්තර ස්වාධීන පරීක්ෂණයකට ඉඩ දිය යුතු බවත් ඇය පවසනවා. විවෘත භාවය සහ විනිවිදභාවය ප්‍රජාතන්ත්‍රවාදය වෙනුවෙන් ඉතා වැදගත් බවයි ඇය පවසන්නේ.
කෙසේ නමුත් නෝර්වේ රාජ්‍යයට ඉදිරියටත් ශ්‍රී ලංකාවට සහාය දිය හැක්කේ කෙසේදැයි නෝර්වේජියානු විදේශ අමාත්‍යවරයා සතුව හොඳ සැලැස්මක් ඇති බවට තමා විශ්වාස කරන බවත් ඇය පවසනවා.
ශ්‍රී ලාංකික සම්භවයක් ඇති කම්ශාජිනී ගුණරත්නම් මීට පෙර ඔස්ලෝ අගනුවර නියෝජ්‍ය පුරපතිනිය වශයෙන් ද කටයුතු කර තිබෙනවා.
1988 මාර්තු 27 වැනිදා යාපනයේ උපත ලද කම්ශාජිනී ගුණරත්නම් මීට පෙර ඔස්ලෝ අගනුවර නියෝජ්‍ය පුරපතිනිය වශයෙන් ද කටයුතු කර තිබෙනවා.
පසුගිය දා පැවැති නෝර්වීජියානු පාර්ලිමේන්තු මැතිවරණයෙන් ජොනාස් ගාහ් ස්ටෝර්ගේ (Jonas Gahr Støre) කම්කරු පක්ෂය ජයග්‍රහණය කළේය. එම පක්ෂය නියෝජනය කරමින් කම්සි ද පාර්ලිමේන්තුවට තේරී පත්වී තිබේ. ඇය නෝර්වීජියානු පාර්ලිමේන්තුවට පත්වූ පළමු ශ්‍රී ලාංකිකයායි.
