හිටපු ජනපති මෛත්‍රීපාල සිරිසේන මහතා සහ හිටපු ආරක්ෂක ලේකම්වරයෙක් වූ වත්මන් ජනපති ගෝඨාභය රාජපක්ෂ මහතාට එරෙහිව ඝාතන කුමන්ත්‍රණයක් සිදුවූ බවට නාමල් කුමාර නැමැත්තෙක් සිදුකළ පැමිණිල්ලට අදාලව විමර්ශන අවසන් බව මහජන ආරක්ෂක අමාත්‍ය සරත් වීරසේකර මහතා පවසනවා.
විමර්ශන අවසානයේදී ඊට කිසිදු දේශපාලන පක්ෂයක් හෝ දේශපාලඥයෙක් සම්බන්ධ නොමැති බවට තහවුරු වූ බවයි අමාත්‍යවරයා පවසන්නේ
සරත් වීරසේකර මහතා මේ බව සඳහන් කළේ පාර්ලිමේන්තු මන්ත්‍රී නලීන් බණ්ඩාර මහතා සභාව කල් තබන අවස්ථාවේ යොමු කළ ප්‍රශ්නයකට පිළිතුරු ලබා දෙමින්.
අදාල පැමිණිල්ල 2018 සැප්තැම්බර් 15 වැනි දින කරන ලද බවත් ඊට අදාලව විමර්ශන කටයුතු අවසන් කර 2019 සැප්තැම්බර් 09 වැනි දින එම ගොනු නීතිපති උපදෙස් පතා යොමු කළ බවත් අමාත්‍යවරයා එහිදී පවසා සිටියා.
එලෙස අධිකරණය හමුවේ එතෙක් තිබූ මීට අදාල උදෘත ගොනු ලබා ගෙන පොලිස්පතිවරයාගේ උපදෙස් පරිදි පොලිස් විශේෂ විමර්ෂන ඒකකය මගින් මෙම ඝාතන කුමන්ත්‍රනයට අදාලව මූලික විමර්ෂනයක් සිදු කරමින් පවතින බවත් ඔහු එහිදී සඳහන් කර සිටියා.
