ජනාධිපතිවරයාට සහ රජයට එරෙහිව කොළඹ ගාලුමුවදොර පිටියේ පැවැත්වෙන මහජන විරෝධතාවයට ශ්‍රී ලංකා අමරපුර නිකායේ ප්‍රධාන සංඝනායක පදවිය දරන පූජ්‍ය ඕමල්පේ සෝභිත හිමියන් ඇතුළු සංඝයාවහන්සේ රැසක් එක්ව තිබෙනවා.
පූජ්‍ය ඕමල්පේ සෝභිත හිමියන් භික්ෂූන් වහන්සේලා පිරිසක් ද සමඟ අද (11) විරෝධතාව පැවැත්වෙන ස්ථානයට පැමිණ රටේ ජනතාවට සහයෝගීතාව පළ කළා.
මහානායක හිමිවරුන් ඉදිරිපත් කර ඇති යෝජනා ක්‍රියාත්මක කරන ලෙසයි උන්වහන්සේ වැඩිදුරටත් රජයෙන් ඉල්ලා සිටින්නේ.
මහානායක හිමිවරුන්ගේ යෝජනාවලට නව රජයක් පත් කිරීම සහ අග්‍රාමාත්‍යවරයා පත් කිරීම ඇතුළු තවත් ඉල්ලීම් ඇතුළත් වේ. ජනාධිපති ලේකම් කාර්යාල පරිශ්‍රයට ඇතුළු වීමට නොහැකි වූ බැවින් එහි ආරක්ෂක රාජකාරියේ යෙදී සිටි පොලිස් නිලධාරීන්ට භික්ෂූන් වහන්සේලා පිරිස සිය ඉල්ලීම් ඇතුළත් පෙත්සමක් භාර දී ඇත.
මේ අතර, අද පෙරවරුවේ ගාලුමුවදොර පිටියේ පැවති මහජන විරෝධතාවයට නන්දා මාලිනී ඇතුළු ප්‍රවීණ කලාකරුවන් පිරිසක්ද එක්ව සිටියා.
තවද එම විරෝධතාවයට රංගන ශිල්පිනී සංගීතා වීරරත්න ප්‍රමුඛ තවත් කලාකරුවන් පිරිසක් ද එක්ව සිටියා.
