දහසක් බලාපොරොත්තු තබාගෙන ආණ්ඩුවට ඡන්දය දුන් හැටනව ලක්ෂයකට කෙළෙහි ගුණ සලකන්නේ මෙසේ දැයි විමසිය යුතුව ඇති බව විපක්ෂ නායක සජිත් ප්‍රේමදාස මහතා පවසනවා.
ගොවි ජනතාව පාරට ඇද දමා, ගොවිබිම් ටික කුණු කොල්ලෙට විදේශිකයන්ට විකුණා දමන තත්වයට වත්මන් රජය විසින් රට පත් කොට ඇති බවයි ඔහු පවසන්නේ.
ඒ, හිටපු පාර්ලිමේන්තු මන්ත්‍රී වසන්ත අලුවිහාරේ මහතා විසින් මාතලේ තොටගමුව වෙල්යාය අසල ඊයේ (28) සංවිධානය කර තිබූ උද්ඝෝෂණයකට සහභාගී වෙමින්.
මීට මාතලේ දිස්ත්‍රික් පාර්ලිමේන්තු මන්ත්‍රීනි රෝහිණි කුමාරි විජේරත්න, හිටපු නියෝජ්‍ය අමාත්‍ය රංජිත් අලුවිහාරේ ඇතුළු මහජන නියෝජිතයින් රැසක් මෙම උද්ඝෝෂණයට එක්ව සිටියහ.
ජනතාවට එදාවේලවත් පිරිමසා ගත නොහැකි මට්ටමට රට පත් කොට පෝලිම් යුගයක් නිර්මාණය කළ රජය, ඒ අතරේ ගොවි ජනතාවට සිදු කොට ඇති විනාශය සාහසික විනාශයක් බවත්
මැති ඇමතිවරුන් ගොස් තානාපතිවරුන් ළඟ දණ ගසා වැටෙන තත්ත්වයට පත්ව ඇති බවත් විපක්ෂනායකවරයා පවසනවා.
රටේ අභිමානය තුට්ටු දෙකට දැමූ ආණ්ඩුවේ පුහු දේශප්‍රේමීත්වය මේ වන විට රටටම පෙනී ඇතැයි පැවසූ විපක්ෂ නායකවරයා, මේ රටේ ගොවි ජනතාව රැක ගැනීමේ, කෙත්වතු සරුසාර කිරීමේ වගකීම සමගි ජන බලවේගය භාර ගන්නා බව ද බවත් පවසා සිටියා.
