ඊශ්‍රායල ප්‍රහාර ආරම්භ කළ ජුනි 13 වන දින සිට ඉරානයේ පුද්ගලයින් 400 කට වැඩි පිරිසක් මිය ගොස් 3000ක් පමණ තුවාල ලබා ඇති බව ඉරානය පවසනවා.
ඉරාන විදේශ අමාත්‍ය අබ්බාස් අරග්චි පවසන්නේ ඇමරිකා එක්සත් ජනපදය ඊශ්‍රායලයේ ආක්‍රමණශීලීත්වයට සම්බන්ධ වුවහොත් එය සෑම කෙනෙකුටම ඉතා භයානක වනු ඇති බවයි.
මේ අතර, ඉරානය න්‍යෂ්ටික අවියක් ගොඩනඟන බවට කිසිදු සාක්ෂියක් නොමැති බව ප්‍රකාශ කිරීම වැරදි බව පවසමින් එක්සත් ජනපද ජනාධිපති ඩොනල්ඩ් ට්‍රම්ප් ඔහුගේ ජාතික බුද්ධි අධ්‍යක්ෂ තුල්සි ගැබාර්ඩ්ට ප්‍රසිද්ධියේ බැණ වැදී තිබෙනවා.
මේ අතර, ඊශ්‍රායලය විසින් ඉරානයේ න්‍යෂ්ටික මධ්‍යස්ථානවලට අඛණ්ඩව එල්ල කරන ප්‍රහාරවලින් යම් බලපෑමක් ඇති වුවහොත් ඉන් පීඩාවට පත් වන පුද්ගලයින්ට ප්‍රතිකාර කිරීමට සූදානම් බව ඉරානයේ නියෝජ්‍ය සෞඛ්‍ය අමාත්‍ය අලි ජෆාරියන් සඳහන් කරනවා.
ඊශ්‍රායලය සාම්ප්‍රදායික නොවන අවි භාවිතා කරන බවට තවමත් වාර්තා වී නොමැති වුවත් න්‍යෂ්ටික ප්‍රතික්‍රියාකාරක ඉලක්ක කර ගත් අවස්ථාවක න්‍යෂ්ටික කාන්දුවකට මුහුණ දීමට සූදානම් බව ඔහු අවධාරණය කර තිබෙනවා.(අල්ජසීරා)
