ඉදිරි පාර්ලිමේන්තු මැතිවරණයේදී දෙමළ ජාතික සන්ධානය ලෙස නිවස සලකුණ යටතේ තරග කිරීමට ඉලංගෙයි තමිල් අරසු කච්චි පක්ෂය තීරණය කර තිබෙනවා.
අද (28) පැවැති පක්ෂ මධ්‍යම කාරක සභාව රැස්වීමේදී එම පක්ෂය මෙම තීරණය ගෙන ඇති බවයි වාර්තා වෙන්නේ.
ඒ අනුව පාර්ලිමේන්තු මැතිවරණයට ටෙලෝ සහ ප්ලොට් යන පක්ෂ සමඟ සන්ධානගත වී පාර්ලිමේන්තු මැතිවරණය සඳහා තරඟ කිරීමට එම පක්ෂය සැලසුම් කර තිබෙනවා
එමෙනෙම, අනෙක් පක්ෂවල තීරණය දැනුම්දීමට තුනක කාලයක් ලබාදීමට ද අදාළ රැස්වීමේදී එකඟ වී ඇති බව සඳහන්.
අදාළ යෝජනාවට මධ්‍යම කාරක සභාවේ සාමාජිකයන් බොහෝ දෙනෙකු සිය ප්‍රසාදය පළ කර ඇති බවටද තොරතුරු වාර්තා වෙනවා.
මේ අතර, ඉදිරි මහ මැතිවරණයක දී දෙමළ සහ මුස්ලිම් පක්ෂ එක්ව නව සන්ධානයක් ගොඩ නැගීම සම්බන්ධයෙන් සාකච්ඡා ආරම්භ කර තිබෙනවා.
දෙමළ ප්‍රගතිශීලී සන්ධානයේ නායක මනෝ ගනේෂන්, ශ්‍රී ලංකා මුස්ලිම් කොංග්‍රසයේ නායක රවුෆ් හකීම් සහ දෙමළ ජාතික සන්ධානය නියෝජනය කරමින් එම්.ඒ සුමන්තිරන් යන හිටපු මන්ත්‍රීවරුන් අතර මෙම සාකච්ඡාව පැවැත්වෙනු ඇති බවයි වාර්තා වෙන්නේ.
මෙහි පළමු වටයේ සාකච්ඡා පසුගිය සතියේ පවත්වා ඇති අතර එහිදී ඉදිරි මැතිවරණවල දී දෙමළ මුස්ලිම් පක්ෂ එක්ව තරග කිරීම සම්බන්ධයෙන් අවධානය යොමුව තිබුණා.
කෙසේ වෙතත් මෙහිදී නව සන්ධානයක් බිහි කිරීම පිළිබඳ අවසන් එකඟතාවයකට පැමිණ නොමැති බව වාර්තා වෙනවා.
