අධිකරණ සහ ජාතික ඒකාබද්ධතා අමාත්ය නීතිඥ හර්ෂණ නානායක්කාර මහතා අද (16) අපරාධ පරීක්ෂණ දෙපාර්තමේන්තුවට පැමිණිල්ලක් ඉදිරිපත් කර තිබෙනවා.
ඒ, පාර්ලිමේන්තු වෙබ් අඩවියේ තම නම ඉදිරියේ දෝෂ සහගත ලෙස ආචාර්ය යනුවෙන් සඳහන් කිරීමේ සිදුවීම සම්බන්ධයෙන්.
තම දේශපාලනය කෙරෙහි ඇති විශ්වාසය බිඳදැමීමේ අරමුණින් ව්යාජ දත්ත ඇතුළත් කර ඇති බව හෝ යම් අයෙක් තමාව අපකීර්තියට පත්කිරීම මෙසේ කර ඇතිද යන්න සම්බන්ධයෙන් සැක සහිත බව අමාත්යවරයා පවසනවා.
මේ සම්බන්ධයෙන් පැමිණිල්ලක් ඉදිරිපත් කිරීමට අපරාධ පරීක්ෂණ දෙපාර්තමේන්තුවට පැමින සිටි අවස්ථාවේදී මාධ්ය වෙත අදහස් දැක්වූ අමාත්ය නීතිඥ හර්ෂණ නානායක්කාර මහතා ,
“මම අවුරුදු 25ක නීතිඥ කේෂ්ත්රයේ යෙදී සිටින නීතිඥවරයෙක්. මම කවදාවත් මගේ නම ඉදිරියෙන් ආචාර්ය කියලා සඳහන් කරලා නෑ. විසිටින් කාඩ් එකක්වත් ගහලා නෑ. මම පුරවපු ජීවදත්ත තොරතුරු පත්රිකාවෙත් මම පැහැදිලිව එය නිවැරදි කරලා තිබුණා. ආචාර්ය පදවියක් තිබුණේ නෑ. කොහෙන්ද මේක එන්නේ. සියල්ල සමස්තයක් ලෙස අරන් බලද්දි ඕනෑම කෙනෙකුට සැකයක් මතුවෙනවා මාව අපකීර්තියට පත්කරන්න එහෙම නැත්නම් මගේ දේශපාලනය ගැන තියෙන විශ්වාසය බිඳදැමීමට ව්යාජ දත්ත ඇතුළත් කරාදැයි සාධාරණ සැකයක් ඕන කෙනෙක් මතුවෙනවා.”
පාර්ලිමේන්තු වෙබ් අඩවියේ අධිකරණ අමාත්ය නීතිඥ ගරු හර්ෂණ නානායක්කාර මහතාගේ නම ඉදිරියේ සඳහන් ව තිබු ආචාර්ය නාමය සම්බන්ධව පාර්ලිමේන්තුව පසුගියදා (13) නිවේදනයක් නිකුත් කළා.
එම නිවේදනයේ සඳහන් වුණේ පාර්ලිමේන්තු වෙබ් අඩවියේ මන්ත්රීවරයන්ගේ නාමාවලිය තුළ අමාත්ය නීතිඥ ගරු හෂණ නානායක්කාර මහතාගේ නම ඉදිරියේ ආචාරය යනුවෙන් සඳහන් වීම අදාළ තොරතුරු ඇතුළත් කිරීමේදී අතපසු වීමකින් සිදු වූවක් බවයි.
