විවිධ පාර්ශ්ව විසින් සිදුකරන අසංවිධානාත්මක විරෝධතා සම්බන්ධයෙන් විමසිලිමත් වන ලෙස ජනතා විමුක්ති පෙරමුණ මහජනතාවගෙන් ඉල්ලා සිටිනවා.
එම පක්ෂය නිවේදනය කරන්නේ රටේ ආර්ථික අර්බුදය සම්බන්ධයෙන් ආණ්ඩුවේ ක්‍රියාකලාපයට එරෙහිව මහජන විරෝධතා රැසක් සංවිධානය වෙමින් පවතින බැවින් මෙම ඉල්ලීම සිදු කරන බවයි.
දේශපාලන පක්ෂ, සිවිල් සංවිධානවලට පරිබාහිරව සාමාන්‍ය ජනතාවටද සිය විරෝධය දැක්වීමට අයිතියක් ඇතත් වගකිවයුත්තෙක් නොමැති, සංවිධානය කරන්නෙක් නොමැති අසංවිධානාත්මක විරෝධය පෑම්වලට එක්වන පිරිස් සම්බන්ධයෙන් අවධානයෙන් පසුවන්නැයි එම පක්ෂය ඉල්ලා සිටිනවා.
එවැනි මහජන විරෝධතා පිටුපස අනතුරක් තිබිය හැකි බව ඔවුන් වැඩිදුරටත් සදහන් කරනවා.
මේ වන විට විවිධ සමාජ මාධ්‍ය ඔස්සේ දැවැන්ත විරෝධතා ව්‍යාපාරයකට පිරිස් ඒකරාශී වෙමින් සිටින බවට තොරතුරු වාර්තා වනවා.
ඒවා සංවිධානය කරන්නෙක් හෝ සංවිධානයක් පිළිබදව ප්‍රසිද්ධ කර නොමැති අතර බොහෝ දෙනා පවසන්නේ එය ජනතා විරෝධයක් බවයි.
