නිරෝධායන රෙගුලාසි උල්ලංඝණය කරමින් විරෝධතාවයක් පැවැත්වීම හේතුවෙන් ජනතා විමුක්ති පෙරමුණේ සාමාජිකයන් වන සමන්ත විද්‍යරත්න හා නාමල් කරුණරත්න ඇතුළු තිදෙනෙක් අත්අඩංගුවට ගෙන තිබෙනවා.
ගොවීන් මුහුණ දෙන පොහොර ගැටළුව සම්බන්ධයෙන් බණ්ඩාරවෙල – බෝරලන්ද ප්‍රදේශයේ මෙම විරෝධතාව පවත්වා තිබෙනවා.
අදාළ විරෝධතාවය සංවිධානය කිරීම සම්බන්ධයෙන් මීට පෙර පුද්ගලයින් 5 දෙනෙකු අත්අඩංගුවට ගෙන වැලිමඩ මහේස්ත්‍රාත් අධිකරණයට ඉදිරිපත් කිරීමෙන් අනතුරුව ඔවුන් රුපියල් 100,000 බැගින් වූ ඇප මත මුදා හැරුණා.
කෙසේ වෙතත් අදාළ විරෝධතාවයේදී නිරෝධායන නීති උල්ලංඝණය කරමින් උද්ඝෝෂණයක් සංවිධානය කිරීමට සම්බන්ධ වූ බැවින් සමන්ත විද්‍යරත්න සහ නාමල් කරුණරත්න ඇතුළු තවත් 5 දෙනෙකු අත්අඩංගුවට ගැනීමට නොතීසි නිකුත් කරන ලෙස පොලිසිය අධිකරණයෙන් ඉල්ලා තිබුණා.
එම ඉල්ලීමට ප්‍රතිචාර දක්වමින් මහේස්ත්‍රාත්වරයා දැනුම් දී ඇත්තේ නිරෝධායන නීතිය උල්ලංඝණය කර ඇත්නම් ඔවුන් අත්අඩංගුවට ගෙන අධිකරණයට ඉදිරිපත් කිරීමට අවශ්‍ය පියවර ගන්නා ලෙසයි.
ඒ අනුව මීට දින කිහිපයකට පෙර ජනතා විමුක්ති පෙරමුණේ හිටපු පළාත් සභා මන්ත්‍රී සමන්ත විද්‍යරත්න සහ සමස්ත ලංකා ගොවි සම්මේලනයේ කැඳවුම්කරු නාමල් කරුණරත්න අත්අඩංගුවට ගැනීම සඳහා පොලීසිය පරීක්ෂණ ආරම්භ කර තිබුණා.
