ආරක්ෂක අමාත්‍යංශ ලේකම්වරයා සහ යුද හමුදාපතිවරයා තමන්ට තර්ජනය කළ බවත් ඔවුන් පාර්ලිමේන්තු වරප්‍රසාද කමිටුව වෙත කැඳවන ලෙසත් පාර්ලිමේන්තු මන්ත්‍රී චන්දිම වීරක්කොඩි මහතා අද (06) පාර්ලිමේන්තුවේදී ප්‍රකාශ කළා.
මන්ත්‍රීවරයා පැවසුවේ තමන් හමුදාවේ ඉහළ නිලධාරීන් ගේ වාහන පාවිච්චිය ගැන කළ ප්‍රකාශයක් ගැන ජාතික ආරක්ෂාව පිළිබඳ ආංශික අධීක්ෂණ කාරක සභාවේදී ආරක්ෂක ලේකම්වරයා සහ හමුදාපතිවරයා තර්ජනාත්මක ප්‍රතිචාරයක් දැක්වූ බවයි.
එමෙන්ම, එම සාකච්ඡාව අතරතුර ආරක්ෂක ලේකම්වරයා තමාට පහර දීමටද උත්සාහ කළ බව චන්දිම වීරක්කොඩි මහතා සඳහන් කළා.
මේ අතර, හමුදාපතිවරයාගේ නිල නිවාසයේ ගෙවත්ත නවීකරණය සඳහා රුපියල් ලක්ෂ 800ක් වියදම් කර ඇති බවට පාර්ලිමේන්තු මන්ත්‍රී චන්දිම වීරක්කොඩි මහතා පවසනවා.
ඔහු සඳහන් කළේ වත්මන් හමුදාපතිවරයාගේ නිසි ධූර කාලය ඉක්මවා ගියද දේශපාලන හිතවත්කම මත ඔහු තවමත් එම ධූරයේ රැඳී සිටින බවයි.
