චීනය දකුණු චීන මුහුදේ විශාල ප්‍රදේශයක බලය තහවුරු කර ගැනීම සදහා ආක්‍රමණකාරී හැසිරීමක නිරත වන බවට ඇමරිකානු උප ජනාධිපති කමලා හැරිස් චෝදනා කරයි.
ඇය සදහන් කරන්නේ මෙම බාධාකාරී සහ බලහත්කාරී හැසිරීමට එරෙහිව කලාපයේ රටවල් සමග එක්ව කටයුතු කිරීමට ඇමරිකාව සූදානම් බවයි.
සිංගප්පූරුවේ දී මාධ්‍ය වෙත අදහස් දක්වමින් ඇමරිකානු උප ජනාධිපතිවරිය තවදුරටත් සදහන් කළේ කලාපයේ සෙසු රටවල් සම්පූර්ණයෙන්ම නොතකා හරිමින් චීන සිය බල ව්‍යාප්තිය සිදුකරමින් සිටින බවයි.
සම්පත් බහුල දකුණු චීන මුහුදේ අයිතිය හිමි රටවල් අතර චීනය, පිලිපීනය, ඉන්දුනීසියාව, මලයාසියාව, වියට්නාමය, බෲනායි මෙන්ම තායිවානය ද වේ.
මෙම රටවලට අයත් අනන්‍ය ආර්ථික කලාපයන් මෙන්ම ජාත්‍යන්තර මුහුදේ ද බලය අන්තර්ජාතික නීති සහ රීතිවලට පටහැනිව යමින් තමන් වෙත නතු කරගැනීමට චීනය කටයුතු කරන බවට දිගුකලක සිට චෝදනා එල්ල වී තිබේ.
