කෙරවලපිටිය යුගදනවි විදුලි බලාගාරයෙන් 40% ක් ඇමරිකානු New Forstress Inc සමාගමට ලබා දීමට ඇති කර ගත් එකඟතාව පිළිබඳව අග්රාමාත්යවරයා සහ මුදල් අමාත්යවරයා සමඟ තවදුරටත් සාකච්ඡා කරන ලෙස ජනාධිපති ගෝඨාභය රාජපක්ෂ රජයට අනුබද්ධ පාර්ශවයන්ට උපදෙස් දී තිබේ.
ජනාධිපතිවරයා මේ බව සඳහන් කළේ අදාළ ගිවිසුම ගැන සාකච්ඡා කිරීම සඳහා ජනාධිපතිවරයා සමඟ හමුවක් ඉල්ලා රජයට සම්බන්ධ පක්ෂ 11 ක නායකයින් විසින් යොමු කරන ලද ලිපියකට ප්රතිචාර දක්වමිනි.
මේ සම්බන්ධව ජනාධිපතිවරයා පක්ෂ නායකයින්ට ලිපියකින් දැනුම් දුන් බව අමාත්ය වාසුදේව නානායක්කාර මහතා පවසනවා.
මේ අතර ජනාධිපතිවරයා විසින් එවන ලද ප්රතිචාර ලිපිය සම්බන්ධයෙන් සාකච්ඡා කිරීම සඳහා ආණ්ඩුවට සම්බන්ධ පක්ෂ 11 ක නායකයින් ඊයේ (16) හිටපු ජනාධිපති, ශ්රීලනිප සභාපති මෛත්රීපාල සිරිසේන මහතාගේ නිල නිවසේදී රැස්විය.
යුගදනවි විදුලි බලාගාරයේ කොටස් වලින් 40% ක් ඇමරිකානු නිව් ෆෝට්රස් ඉන්කෝපරේෂන් වෙත පවරා දීමේ ගිවිසුම ගැන කනස්සල්ලට පත් වන බව දන්වමින් ආණ්ඩුවට සම්බන්ධ පාර්ශවයන් 11ක් සැප්තැම්බර් 23 වන දින අග්රාමාත්ය මහින්ද රාජපක්ෂ හමුවී සාකච්ඡා කළ අතර එම පක්ෂ නායකයින් මෙම කරුණ පිළිබඳව තවදුරටත් සාකච්ඡා කිරීමට ජනාධිපතිවරයා හමුවන බව පැවසීය.
අග්රාමාත්යවරයා සමඟ පැවති සාකච්ඡාවට ශ්රී ලංකා නිදහස් පක්ෂය, ශ්රී ලංකා කොමියුනිස්ට් පක්ෂය, ලංකා සම සමාජ පක්ෂය, ජාතික නිදහස් පෙරමුණ සහ ප්රජාතන්ත්රවාදී වාමාංශික පෙරමුණ ඇතුළු ආණ්ඩුවට සම්බන්ධ පක්ෂ 11 ක නියෝජිතයින් සහභාගී වූහ.
කෙසේ වෙතත් මේ දක්වා ජනාධිපතිවරයා සමඟ සාකච්ඡාවකට ඉඩ ලැබී නොමැති පසුබිමක ලබන 23 වැනිදා රැස් වී සාකච්ඡා කිරීමටද ඔවුන් තීරණය කර ඇති බවයි පැවසෙන්නේ