අධ්‍යාපනය, සෞඛ්‍යය, පුනර්ජනනීය බලශක්තිය, රැකියා, කෘෂිකර්මය සහ ග්‍රාමීය සංවර්ධනය ඇතුළු ක්ෂේත්‍ර කිහිපයක් සඳහා ශ්‍රී ලංකාවට වැඩිදුර සහාය ලබාදීමට කොරියාව එකඟතාව පළකර තිබෙනවා.
අගමැති දිනේෂ් ගුණවර්ධන මහතා කොරියානු සංචාරයේ දී කරන ලද සාකච්ඡාවල දී ගනු ලැබූ තීරණ පිළිබඳ පසුවිපරම් ක්‍රියාමාර්ග සාකච්ඡා කිරීම සඳහා කොරියානු ජනරජයේ තානාපති මියොන් ලී මහත්මිය හා අගමැතිවරයා අතර කොළඹ අගමැති කාර්යාලයේ දී ඊයේ (10) පැවැති හමුවේ දී තානාපතිවරිය මේ බව ප්‍රකාශ කර තිබුණා.
අගමැතිවරයා පසුගියදා සිදු කළ සංචාරයේදී කොරියානු ජනරජයේ අගමැති හැන් ඩක් සෝ (Han Duck-so), ජාතික මන්ත්‍රණ සභාවේ කථානායක කිම් ජින්-පියෝ (Kim Jin-pyo), ග්යෙන්ග්සන්ග්-ඩු (Gyengsang-do), පළාතේ ආණ්ඩුකාර ලී චෙයොල් වූ (Lee Cheol-Woo) සහ එක්සත් ජාතීන්ගේ හිටපු මහලේකම් සහ හරිත වර්ධන ආයතනයේ (Green Growth Institute) වත්මන් සභාපති බෑන් කී මූන් සමඟ සාකච්ඡා පවත්වනු ලැබුවා.
අගමැතිවරයාගේ ඉල්ලීම පරිදි පාසල් මට්ටමින් තොරතුරු තාක්ෂණ අධ්‍යාපනය දියුණු කිරීමට රජය ගන්නා උත්සාහයට සහාය වීම සඳහා ශ්‍රී ලංකාවේ පාසල් 1, 000කට සුහුරු පන්ති කාමර ලබාදීමට මෙම සාකච්ඡාවලදී කොරියාව එකඟතාවය පළ කර තිබුණා
එමෙන්ම, රජයේ රෝහල්වල කෙටිකාලීනව වෛද්‍ය කටයුතුවල යෙදීම සඳහා වෛද්‍යවරුන් සහ වෛද්‍ය කණ්ඩායම් ශ්‍රී ලංකාවට එවීමටත් මෙරට වෛද්‍යවරුන් සමඟ ඔවුන්ගේ විශේෂඥ දැනුම බෙදා ගැනීමටත් කොරියාව කටයුතු කරනු ඇති.
මේ අතර, දැනට ක්‍රියාත්මක ව්‍යාපෘති කඩිනමින් නිම කිරීමට අමතරව ශ්‍රී ලංකාවේ නව සංවර්ධන ව්‍යාපෘති කිහිපයක් ක්‍රියාත්මක කිරීම සඳහා තම රට කටයුතු කරන බව තානාපති මියොන් ලී මහත්මිය පවසා තිබෙනවා.
ජල පිරිපහදුව, සනීපාරක්ෂාව, අපද්‍රව්‍ය බැහැර කිරීමේ පද්ධති සහ වියළි කලාපීය කෘෂිකර්මාන්තය පිළිබඳ ව්‍යාපෘති තුනක් දැනටමත් ක්‍රියාත්මක කර ඇති බව එම මහත්මිය පෙන්වා දෙනවා.
එමෙන්ම, පුනර්ජනනීය බලශක්තියට අදාළ නියමු ව්‍යාපෘතියක් ලෙස රත්නපුර දිස්ත්‍රික්කයේ චන්ද්‍රිකා වැව මත පාවෙන සූර්ය පැනල සවි කිරීම ද කොරියාව විසින් සිදු කරනු ලබන අතර ශ්‍රී ලාංකික ශ්‍රමිකයින් සඳහා පුහුණු/වෘත්තීය අංශවල මෙන්ම කාලීනව කෘෂිකාර්මික අංශයේ රැකියා කෝටාව වැඩි කිරීමට කොරියානු නායකයින් එකඟ වී තිබෙනවා.
