සහල් තොග වෙළෙඳාමට සහ සිල්ලර වෙළෙඳාමට පනවා තිබූ මිල පාලනය ඉවත් කිරීමට ඊයේ (27) පස්වරුවේ පැවති අමාත්ය මණ්ඩල රැස්වීමෙදි තීරණය කිරීමත් සමග සහල් සදහා නව මිල රජයෙන් නොව මහා පරිමාණ සහල් මෝල් හිමියන් නිවේදනය කර තිබෙනවා.
ඒ අනුව නාඩු කිලෝවක් රුපියල් 115 ක් ලෙසත්, සම්බා කිලෝවක් රුපියල් 140 ක් ලෙසත්, කීරි සම්බා කිලෝවක් රුපියල් 165 ක් ලෙසත් සහල් මෝල් හිමියන් නිවේදනය කරනවා.
සහල් සඳහා පනවා තිබූ පාලන මිල ඇතුළත් ගැසට් නිවේදනය අවලංගු කිරීමත් සමඟ ගොවීන් සහ අතරමැදි රැස් කරන්නන් විසින් මෝල් හිමියන් වෙත වී ලබාදීම ප්රතික්ෂේප කරන බැවින් සහල් මිල ඉහළ යා හැකි බව මීට පෙර සමස්ත ලංකා සුළු හා මධ්ය පරිමාණ සහල් මෝල් හිමියන්ගේ සංගමයේ සභාපති ඩී.කේ. රංජිත් මහතා ප්රකාශ කළා.
වී සඟවා සිටින බව පවසා මීට පෙර පාරිභෝගික අධිකාරිය විසින් මහා පරිමාණ වී මෝල් වෙත ගොස් වැටලීමේ මෙහෙයුමක් ක්රියාත්මක කර වී තොග අල්ලාගත් බව පැවසුවද මේ වන විටත් වෙළෙඳපොළේ සහල් හිඟයක් පවතිනවා.
මේ අතර ඊයේ (27) රැස්වූ කැබිනට් මණ්ඩලය තීරණය කර තිබුණේ වෙළඳපොලේ සහල් මිල ඉහළ යෑම වැළැක්වීම සඳහා සහල් මෙට්රික් ටොන් ලක්ෂයක් වහාම ආනයනය කිරීමටයි.