තලවකැලේ ඉහළ කොත්මලේ ජලාශය අසල පෞද්ගලික අවන්හලක සාදයක් පැවැත්වීම සම්බන්ධයෙන් තලවකැලේ ලිඳුල නගර සභාවේ සභාපති සහ තවත් හය දෙනෙකු ඊයේ අත්අඩංගුවට ගෙන තිබේ.
ලංකා කම්කරු කොංග්රසයේ ආධාරකරුවන් කිහිප දෙනෙකු සහභාගී කර ගනිමින් සභාපතිවරයා සාදයක් පවත්වන බවට 119 හදිසි ඒකකය වෙත කරන ලද පැමිණිල්ලකට අනුව තලවකැලේ පොලිසිය සභාපතිවරයා ඇතුළු පිරිස අත්අඩංගුවට ගෙන ඇත.
පොලිසිය එම ස්ථානයට පැමිණෙන විට සාදයට සහභාගී වූ තවත් පිරිසක් පලා ගිය බව පොලිසිය පවසයි.
එම ස්ථානයේ නගර සභාවට අයත් කැබ් රථයක් ද තිබී ඇති අතර එය පොලිසිය භාරයට ගැනීමට කටයුතු කර ඇත.
නිරෝධායන නීතිය උල්ලංඝනය කිරීම සම්බන්ධයෙන් සභාපතිවරයාට සහ තවත් හය දෙනෙකුට එරෙහිව නීතිමය පියවර ගන්නා බව පොලිසිය පවසයි.