මාලදිවයිනේ නව ජනාධිපතිවරයා ලෙස පත්වූ මොහොමඩ් මුයිසු ඉන්දියානු හමුදාවට මාලදිවයිනෙන් ඉවත් වන ලෙස ඉල්ලා තිබෙනවා.
නොවැම්බර් මාසයේදී ජනාධිපතිවරයා ලෙස දිවුරුම් දීමට නියමිතව සිටින මුයිසු, බී.බී.සී සමඟ පැවති සම්මුඛ සාකච්ඡාවකට එක් වෙමින් ප්‍රකාශ කර ඇත්තේ මාලදිවයිනේ සිටින සෑම ඉන්දීය හමුදා නිලධාරියෙක්ම ඉන් ඉවත් විය යුතු බව ඉන්දීය තානාපතිවරයා වෙත දැනුම් දුන් බවයි.
දීර්ඝ කාලයක සිට මාලදිවයින ඉන්දියාවේ බලපෑමට නතුව ඇති අතර ජනාධිපති මුයිසුගේ මෙම දැඩි තීරණය, මාලදිවයින සහ ඉන්දියාව අතර රාජ්‍ය තාන්ත්‍රික ගැටුමක් නිර්මාණය වීමට පසුබිම සකසනු ඇතැයිද විදෙස් මාධ්‍ය පවසනවා.
මාලදිවයිනේ නව ජනාධිපතිවරයේ ලෙස තේරී පත්වූ මුයිසු ඇතුළු ඔහුගේ සන්ධානය මේ වන විටත් මාලදිවයින තුළ ණය සහ අනෙකුත් යටිතල පහසුකම් වශයෙන් මාලදිවයින තුළ ඩොලර් මිලියන ගණනකින් ආයෝජනය කර ඇති චීනය සමඟ සබඳතා පැවැත්වීමට වැඩි නැඹුරුවක් දක්වනවා.
කෙසේවෙතත් ඉන්දියානු සාගරය තුළ මාලදිවයිනේ පිහිටීමත් සමඟ හට ගෙන ඇති උපාය මාර්ගික අවශ්‍යතා මත ඉන්දියාවද ඩොලර් බිලියන දෙකක පමණ සංවර්ධන ආධාර මාලදිවයිනට ලබා දී තිබෙනවා.
