කෘතිම බුද්ධි තාක්ෂණය භාවිත කර නිපදවූ ගීත සඳහා ඩොලර් මිලියන 10ක් පමණ උපයා ඇති බව කියන ඇමරිකානු ජාතිකයෙකු එරට අධිකරණයෙන් වරදකරුවෙකු ලෙස නම් කර තිබෙනවා.
මේ සම්බන්ධයෙන් සිදු කළ විමර්ශනයේදී අනාවරණය වී ඇත්තේ අදාළ සැකකරු AI තාක්ෂණය උපයෝගී කරගනිමින් නිර්මාණය කර ඇති ගීත ඔහු විසින් සැලසුම්සහගතව සැකසූ ව්‍යාජ ශ්‍රාවකයින්ට (bots) ඇසීමට සැලැස්වීම මඟින් වංචා සහගත ලෙස මුදල් උපයා ඇති බවයි.
52 හැවිරිදි මයිකල් ස්මිත් නමැති මෙම පුද්ගලයා වෘත්තීයමය සංගීතඥයෙකු වන අතර, AI තාක්ෂණය උපයෝගී කරගනිමින් නිර්මාණය කළ ගීතවලින් ව්‍යාජ ලෙස මුදල් ඉපයීම හේතුවෙන් ඔහු අත්අඩංගුවට ගෙන අපරාධ චෝදනා ගොනු කර තිබෙනවා.
මෙම ක්‍රියාව මඟින් ඔහු අදාළ ගීත ඇසීම සඳහා යොමු කර ඇති මාධ්‍යවල (streaming platforms) පවතින රීති උල්ලංඝනය කර ඇති අතරම සංගීත ක්ෂේත්‍රයේ සැබෑ ලෙසම නියැලෙස නිර්මාණකරුවන් අසාධාරණයට ලක් කර ඇති බව දකුණු නිව්යෝර්ක්හි නීතීඥ ඩේමියන් විලියම්ස් පවසා තිබුණා.
