කුරුණෑගල නගරාධිපති තුෂාර සංජීව විතාරණ මහතා ඊයේ (30) සිය උපන්දින සැමරුම පොලිස් නිලධාරීන්ද පිරිවරා පවත්වා තිබෙනවා.
කොවිඩ් -19 වසංගය දුරුවේවායි ප්‍රාර්ථනා කරමින් කුරුණෑගල පොලීසිය විසින් සංවිධානය කරන සත් දින පිරිත් දේශනාවක් මේ දිනවල එම පොලිස් ස්ථාන පරිශ්‍රයේ දී පැවැත්වෙනවා.
එම ස්ථානයට කුරුණෑගල නගරාධිපතිවරයා ඊයේ පස්වරුවේ සහභාගි වූ අතර එහිදි පොලිස් නිලධාරින් විසින් නගරාධිපතිවරයා වෙනුවෙන් උපන්දින කේක් ගෙඩියක් සූදානම් කර තිබෙනවා.
පසුව නගරාධිපතිවරයා එය කපා උපන්දින සාදය එම ස්ථානයේම පවත්වීමට කටයුතු කර තිබුණා.
කෙසේ වෙතත් පොලිස් මාධ්‍ය ප්‍රකාශක නියෝජ්‍ය පොලිස්පති අජිත් රෝහණ මහතා සඳහන් කළේ එය නිරෝධායන නීතින්ට පටහැනි ක්‍රියාවක් බවයි.
ඔහු සදහන් කරන්නේ මෙම සිදුවීම විමර්ශනය කිරීම සඳහා පොලිස් අධිකාරීවරයෙකුගේ ප්‍රධානත්වයෙන් යුතු විශේෂ පොලිස් කණ්ඩායමක් පත්කර ඇති බවයි.
මීට පෙර අවස්ථාවක කුරුණෑගල පිහිටි බුවනෙකබාහු රජ සමයට අයත් බව කියන ගොඩනැගිල්ලක් කඩා ඉවත් කිරීමේ සිද්ධිය සම්බන්ධයෙන් සැකපිට කුරුණෑගල නගර සභාවේ නගරාධිපති තුෂාර සංජීව විතාරණ මහතාට චෝදනා එල්ල වුණා.
එම අවස්ථාවේදී ඔහු වෙනුවෙන් පෙනී සිටිමින් අමාත්‍ය ජොන්ස්ටන් ප්‍රනාන්දු මහතා පවසා සිටියේ නගරාධිපතිවරයාගේ එක මයිල් ගහකට අතතැබීමට නොදෙන බවයි.
ඊට පෙර අවස්ථාවක කුරුණෑගල මහ නගර සභාවේ නගරාධිපති තුෂාර සංජීව විතාරණ මහතා විසින් ගිනිඅවි පෙන්වා පුද්ගලයෙකු බිය ගැන්වීම, මුදල් පැහැර ගැනීම හා පුද්ගලයෙකු පැහැර ගැනීම යන චෝදනාවන්ට අදාළව රක්ෂිත බන්ධනාගාරගත කර සිටියා.
