අද පෙරවරුවේ අග්නිදිග ඕස්ට්‍රේලියාවේ රික්ට මාපකාංක 5.8 භූමිකම්පාවක් සිදුවූ බව විදෙස් මාධ්‍ය වාර්තා කරනවා.
මෙල්බන් නගරයේ ගොඩනැගිලි වලට හානි කරමින් වික්ටෝරියානු ප්‍රාන්තයේ අගනගරයට නුදුරු මෑන්ස්ෆීල්ඩ් ප්‍රදේශයේ පරවරු 9.15 ට වාර්තා වූ භූමිකම්පාවෙන් ජීවිත හානි හෝ බරපතල තුවාල කිසිවක් වාර්තා වී නැතැයි එම වාර්තා වැඩි දුරටත් සඳහන් කරනවා.
මෙල්බන් නුවරට ආසන්නයේ සිදුවූ භුමිකම්පාව දකුණු ඕස්ට්‍රේලියාවට සහ නිව් සවුත් වේල්ස් ප්‍රදේශයට පවා දැනී ඇති බවයි වාර්තා වල සඳහන් වෙන්නේ.
ප්‍රධාන කම්පනයට පසු රික්ටමාපකාංක 4.0 සහ 3.1 ලෙස සටහන් වූ පසු කම්පන දෙකක්ද වාර්තා වී තිබෙනවා.
ඕස්ට්‍රේලියානු භූ විද්‍යා ආයතනයට අනුව සිදුවූ භූමිකාව කිලෝමීටර් 10 ක නොගැඹුරු ප්‍රදේශයේ සිදුවී ඇතැයි වාර්තා වෙනවා.
මේ දිනවල ඇමරිකානු සංචාරයක නිරත ඕස්ට්‍රේලියානු අග්‍රාමාත්‍ය ස්කොට් මොරිසන් සඳහන් කරන්නේ ඕස්ට්‍රේලියාවට භූමිකම්පා දුර්ලභ සිදුවීම් නොවන බවයි.
වැඩිදුරටත් අදහස් දක්වන අග්‍රාමාත්‍යවරයා කියා සිටියේ බරපතල තුවාල හෝ මරණ වාර්තා නොවීම වාසනාවත්ත තත්වයක් බවයි.
කෙසේ වෙතත් මෑත කාලයේ ඕස්ට්‍රේලියාවේ සිදුවූ විශාලතම භූමිකම්පාව මෙය වන අතර තවත් පසු කම්පන කිහිපයක් බලාපොරොත්තුවෙන් හානි වූ ගොඩනැගිලි වලින් පුද්ගලයන් ඉවත් කල බව හදිසි සේවා ප්‍රකාශ කරනවා.
සමහර ට්‍රෑම් සේවාවන්ද නතර කර ඇති අතර අත්‍යවශ්‍යම අවස්ථාවකදී හැර රථවාහන ධාවනයෙන්‍ ඉවත්ව සිටින ලෙස පුරවැසියන්ට දන්වා තිබෙනවා.
කෙසේ වෙතත් රටේ දෙවන විශාලතම නගරය වන මෙල්බන් නුවර කොරෝනා වසංගතය හේතුවෙන් මේ වන විටත් වසාදමා තිබෙන බව මාධ්‍ය වාර්තා කරනවා.
– තිලාන් ජයසේකර –
