ක්ෂුද්‍ර මූල්‍ය ණය වින්දිතයන් විසින් පොළොන්නරුව, හිගුරක්ගොඩ නගරයේදී පවත්වන සත්‍යග්‍රහයට දින 12 ක් ගතවී තිබියදීත්, උතුරු මැද පළාත නියෝජනය කරන අදාළ විෂය භාර රාජ්‍ය ඇමති ෂෙහාන් සේමසිංහ මෙතෙක් එම ගැටළුව සම්බන්ධයෙන් අවධානය යොමුකර නැති බවට සත්‍යග්‍රහයේ නිරත ජනතාව චෝදනා කරයි.
අද (19) දිනයේද ඇමතිවරයා අදාළ ස්ථානයට පැමිණෙන බව දැනුම් දී තිබුණද, මෙතෙක් එම ස්ථානයට පැමිණ නැත. පසුගිය 08 දා මේ සත්‍යග්‍රහය ආරම්භ කෙරුණේ මූලික ඉල්ලීම් 05 ක් මුල්කරගෙන ය.
සියලු ක්ෂුද්‍ර මූල්‍ය ණය කපා හැරීම, කොල්ලකාරී ක්ෂුද්‍ර මූල්‍ය ණය පිළිබඳ විගණනයක් කරන තුරු සියලු ණය අයකර ගැනීම වහාම නතර කිරීම, ක්ෂුද්‍ර මූල්‍ය ණය වින්දිතයන්ට එරෙහිව ගන්නා සියලු නීති ක්‍රියාමාර්ග නතර කිරීම, ක්ෂුද්‍ර ණය මූල්‍ය වින්දිතයන් අසාදු ලේඛනයෙන් වහාම ඉවත් කිරීම සහ ගැති බවින් තොර සමාජ විමුක්තිය කේන්ද්‍ර කරගත් කාන්තාවන් සතු විධිමත් මූල්‍ය ක්‍රමයක් ස්ථාපිත කිරීම එම ඉල්ලීම් වේ.
2020 වසර අවසානය වන විට ක්ෂුද්‍ර මූල්‍ය ණය වින්දිතයන් 200 කට අධික පිරිසක් සියදිවි නසාගත් බවට වාර්තා වී ඇත. 2021 වසරේ මුල් මාස තුනේදී පමණක් දරුවන් සිව්දෙනෙකු සමග මව්වරුන් තිදෙනෙකු මේ හේතුව නිසා සියදිවි නසාගෙන ඇතැයි වාර්තා තිබේ. ගන්දර, කිලිනොච්චිය, තඹුත්තේගම යන ප්‍රදේශවලින් මේ සිදුවීම් වාර්තා වී ඇත.
අදාළ සත්‍යග්‍රහය පැවති දින 12 තුළ, එම ස්ථානයට වගකිවයුතු පාර්ශ්ව ලෙස පැමිණ ඇත්තේ පොළොන්නරුව අතිරේක දිස්ත්‍රික් ලේකම්වරයා සහ හිගුරක්ගොඩ ප්‍රාදේශීය ලේකම්වරයා පමණි.
